Брнабиќ ги повика НАТО и КФОР да реагираат во Косово

Премиерката на Србија, Ана Брнабиќ, денеска ги повика НАТО и КФОР итно да реагираат на Косово и како што додаде „да го скротат премиерот на Косовo Албин Курти“.

„Ситуацијата е повеќе од драматична и ова е последен момент во кој е неопходна јасна реакција за да се запре лудата политика што ја води Приштина. Ваквото однесување ја надмина секоја мерка и не носи на работ на хаос“, се наведува во соопштението од кабинетот на српската премиерка.

Како што е потврдено за агенцијата Танјуг, претседателот на Србија, Александар Вучиќ, отишол во Рашка, југозападно од Србија, на итен состанок со претставниците на Србите на Косово.

Косовската полиција денеска употреби солзавец против демонстрантите кои се упатија кон полицијата во Северна Митровица, изразувајќи незадоволство од полициската акција против шверц на стоки.

Солзавец на протестите во Северна Митровица против акцијата на косовската полиција

Барикада направена од камиони беше поставена во Северна Митровица, во близина на населбата Бошњак, на главниот пат што води од југ кон север од градот.

Според директорот на Здравствениот дом во Северна Митровица, Златан Елек, шест лица се повредени за време на полициската акција. Тој не прецизира за какви повреди станува збор, бидејќи, според него, „пациентите се во фаза на дијагностика“.

Денеска косовската полиција заплени разни стоки и одредени материјални докази за кои постои сомневање дека се шверцувани.

„Акцијата, која се уште трае, се прошири на неколку локации во Косово, вклучувајќи го и регионот на Северна и Јужна Митровица, Приштина и Пеќ“, се вели во соопштението на косовската полиција.