Од денеска пријавување за вакцина против сезонски грип
Пријавувањето за вакцинација против сезонски грип почнува од денеска преку веб страницата vakcinacija.mk и со пополнување на формуларот на веб сајтот заинтересираните граѓани се регистрираат за вакцинација директно во системот Мој Термин, соопшти Министерството за здравство.
Оттаму додаваат дека согласно распоредот предвиден во планот за вакцинација, пријавените преку смс порака ќе добијат информација за точниот датум и час кога треба да се вакцинираат на пунктот кој ќе го изберат при регистрацијата на сајтот vakcinacija.mk.
„Вакциницијата против грип не штити од Ковид 19, но е многу значајна во услови на пандемија со Ковид 19 и влијанието на здравствениот систем. Министерството за здравство и оваа година набави 40.000 дози четиритипни вакцини против сезонски грип за следните ризични групи: Стари лица (над 65 години), лица со хронични заболувања, здравствени работници, бремени жени и деца на возраст од 6 месеци до 5 години“, соопшти Министерството.
Вакцината за сезонски грип е бесплатна.
„Поради зголемената побарувачка на вакцини против грип на глобално ниво, се прават напори количините на вакцини да пристигнат во што побрз рок. Нагласуваме дека не е доцна, граѓаните да се вакцинираат против грип во ноември или декември, бидејќи согласно епидемиолошките податоци, оваа болест во последните десетина сезони го достигнува пикот кон крајот на месец февруари“, нагласуваат од Министерството за здравство.