Руски дипломат пронајден мртов пред амбасадата во Берлин

Руски дипломат, осомничен дека е таен агент на руската разузнавачката служба ФСБ, минатиот месец бил пронајден мртов пред руската амбасада во Берлин, објавија германски медиуми. Портпаролот на германското Министерство за надворешни работи рече дека се свесни за смртта на дипломатот, но, не може да даде повеќе детали.

Дер Шпигел објави дека се верува оти 35-годишниот маж паднал од горниот кат на зградата на амбасадата во центарот на Берлин, на само неколку чекори од Бранденбуршката порта.

Руската амбасада не се согласи на обдукција на телото и германските обвинители не се во можност да спроведат истрага поради неговиот дипломатски статус, пишува Дер Шпигел.

Според официјалната листа на дипломати, човекот бил акредитиран како втор секретар на амбасадата од летото 2019 година.

„Инсајдер“ и „Белингкет“ соопштија дека преку отворени извори може да се докаже дека починатиот е Кирил Жало, син на генерал-полковник Алексеј Жало, шеф на Канцеларијата за заштита на уставниот систем на ФСБ.

По испитувањето на базата на податоци за регистрација на возила, иследниците рекоа дека откриле дека Кирил Алексеевич Жало бил регистриран на истата адреса како и неговиот татко во Москва, а претходно во Ростов на Дон.

Кирил Жало, наводно, бил поврзан од западните разузнавачки служби со таканареченото убиство во Тиергартен, во кое Зелимхан „Торнике“ Кангошвили, кој бил во егзил бил застрелан сред бел ден во Берлин во летото 2019 година