СИРИЗА: Наместо да го поддржи Договорот од Преспа, владата се фали што не ги ратификува Меморандумите

Господинот Мицотакис преку неговиот портпарол, наместо да испрати јасна порака за поддршка на Договорот од Преспа, се фали дека наводно е оправданo што веќе две години го поткопува Договорот, со нератификувањето на Меморандумите, соопштуваат од грчката опозициска партија СИРИЗА, јави дописничката на МИА од Атина.

Соопштението доаѓа по ставот на портпаролот на грчката Влада Јанис Иконому, кој на вчерашниот брифинг со новинарите, рече дека нивниот избор да не брзаат со ратификација на Меморандумите со Северна Македонија „се покажува како правилен, бидејќи тие се механизам за контрола на правилното спроведување на Договорот од Преспа“.

„Господинот Мицотакис преку неговиот портпарол, наместо да испрати јасна порака за поддршка на Договорот, се фали дека наводно е оправдан што веќе две години го поткопува, со нератификувањето на Меморандумите, во период на дестабилизација на Владата на Заев што ја прифати промената на уставното име на Северна Македонија, и додека неговите истомисленици, оние од ВМРО, се закануваат дека ќе ги вратат името Македонија без придавка и иредентизмот“, соопштуваат од СИРИЗА.

Иконому-Се покажува правилно што не брзаме со ратификација на Меморандумите

Додаваат дека меморандумите „обезбедуваат воздушниот простор на соседната земја да го надгледуваат грчки воени авиони“ и порачуваат дека „Владата на Мицотакис, не е опасна само за јавното здравје, туку и за надворешната политика на земјата“.