ЕК одобри нова, осма вакцина против корона
„Валнева“ е осмата компанија со која Комисијата склучи договор за набавка на вакцини против ковид 19. Претходно беа потпишани договори со Астра Зенека, Санофи, Џансен, Бионтек/Фајзер, Модерна, Кјурвак и Новавакс.
Договорот со Валнева им овозможува на земјите-членки да купат речиси 27 милиони дози од вакцината во 2022 година. Според договорот, вакцината може да се прилагоди на нови варијанти на соеви, а земјите-членки можат да нарачаат до 33 милиони дополнителни дози од вакцината во 2023 година, пишува Ројтерс.
„Штом Европската агенција за лекови ќе прогласи дека е безбедна и ефикасна, вакцината на Валнева ќе биде уште една опција во нашето широко портфолио на вакцини“, изјави комесарката за здравство Стела Киријакидес.
Се очекува вакцина против ковид и за деца од 5 до 11 години
Валнева е европска биотехнолошка компанија која развива вакцина со инактивиран вирус кој се добива со хемиска инактивација на жив вирус.
Станува збор за традиционална технологија на правење вакцини, која се користи веќе 60-70 години, а се базира на примена на воспоставени методи и е многу безбедна. Се користи во производството на повеќето вакцини против грип и многу вакцини за деца. Во моментов таа е единствената инактивирана вирусна вакцина против ковид 19 која е во клинички испитувања во Европа.
Комисијата, со поддршка на земјите-членки на ЕУ, одлучи да ја поддржи оваа вакцина врз основа на квалитетна научна проценка, применета технологија, искуството на компанијата во развојот на вакцини и нејзиниот производствен капацитет да ги снабдува сите земји-членки на ЕУ.