Бајден на рутинска контрола, овластувањата за кратко пренесени на Харис

Американскиот претседател Џо Бајден во петок на 19 ноември накратко ќе ги пренесе претседателските овластувања на потпретседателката Камала Харис додека е под анестезија за време на претстојниот медицински преглед, објави Белата куќа. Американскиот претседател ќе биде под анестезија поради рутинска колоноскопија. Бајден својот прв рутински преглед како претседател го извршува во медицинскиот центар во предградието на Вашингтон.



Портпаролката на Белата куќа Џен Псаки изјави дека Бајден ќе биде под анестезија за време на процедурата и дека овластувањата ќе ги пренесе на Камала Харис.



„Како што беше случајот со претседателот Џорџ Буш кога ја имаше истата процедура, претседателот Бајден ќе ги пренесе овластувањата на потпретседателката кратко додека е под анестезија. Потпретседателката за тоа време ќе работи од својата канцеларија во Западното “, рече Псаки.



Процесот на привремено пренесување на овластувањата на потпретседателот поради неспособност на претседателот беше ратификуван во 1965 година со одлука на Конгресот и усвојување на 25-тиот амандман на Уставот на САД. Според тој амандман, потпретседателот му ги враќа овластувањата на претседателот веднаш штом ќе се разбуди од анестезија.


Последниот целосен преглед Бајден (78) го направил во декември 2019 година, кога лекарите утврдиле дека поранешниот потпретседател бил „здрав, енергичен“ и „способен успешно да ги извршува своите должности“, се вели во тогашниот медицински извештај.