Членовите на ДИК нема да земат дополнителни бонуси за изборите

Членовите на Државната изборна комисија (ДИК) нема да земат дополнителни надоместоци за локалните избори.

На денешната седница тие изгласаа измена и дополнување на Правилникот за надоместоци на изборните органи за локалните избори и, како што појасни членот на ДИК Борис Кондарко, се работи за прецизирање и дополнување на Правилникот. Освен редовните плати, нема да земат никакви бонуси, иако имаат право на тоа, рече Кондарко.

Надоместоците за други лица вработени во ДИК, лица дополнително ангажирани, членовите на ОИК и ИО остануваат, а се додаваат и членовите на Избирачката комисија на Град Скопје.

Се зголемува за 25 отсто надоместокот за ОИК и ИО во општините каде што имаше втор круг гласање за градоначалник, како и за 20 отсто за избирачките органи во општините каде што имаше гласање на болни и изнемоштени лица.

Дополнителни надоместоци ќе има и за вработените во ДИК во подрачните одделенија и канцеларии на ДИК, како и за вработените во МВР кои го обезбедуваа доверливиот гласачки материјал и терминалите за отпечатоци од прсти.

Првиот круг од локалните избори во земјава се одржа на 17 октомври, а вториот на 31 октомври.