Британија бара финалето во Лига на шампиони да не се одржи во Русија

Британската влада побара овогодинешното финале во Лигата на шампионите да биде преместено од Русија за да се казни земјата поради нејзината интервенција во Украина. Британскиот премиер Борис Џонсон изјави дека на Русија не треба да и се дозволи да биде домаќин на Лигата на шампиони која треба да се одржи во Санкт Петербург на 28 мај.

„Мислам дека е незамисливо големите меѓународни фудбалски турнири да се одржат во Русија по ... инвазијата на суверена земја. Ова е од витално значење во овој критичен момент претседателот Путин да сфати дека тоа што го прави ќе биде катастрофа за Русија “, изјави денеска Џонсон пред пратениците.

Британската министерка за спорт Надин Дорис изјави дека Британија ќе го покрене ова прашање до УЕФА.

„Сериозно сум загрижена за спортските настани што треба да се одржат во Русија, како што е финалето на Лигата на шампионите, и ќе разговарам со релевантните раководни тела за тоа. Нема да дозволиме претседателот Путин да ги искористи настаните на светската сцена за да ја легитимира својата нелегална инвазија на Украина “, напиша Дорис на Твитер.

Западот подготвува санкции откако руската Дума стави печат на одлуките на Путин

Европското фудбалско раководно тело УЕФА, соопшти дека внимателно ја следи ситуацијата.

„Во однос на финалето на Лигата на шампионите на УЕФА во Санкт Петербург во 2022 година, УЕФА постојано и внимателно ја следи ситуацијата и секоја одлука ќе биде донесена во догледно време доколку е потребно“, се вели во пишаната изјава на УЕФА новинската агенција за Ројтерс.

Путин нареди испраќање војници во Украина откако ја призна независноста на Доњецк и Луганск

До ова доаѓа откако рускиот претседател Владимир Путин донесе одлука со која ги признава како независни сепаратистичките региони Доњецк и Луганск во источна Украина. Руските пратеници едногласно го одобрија барањето на Путин за употреба на воена сила надвор од земјата. Со таа одлука се формализира воено распоредување во регионите во источна Украина контролирани од сепаратистите поддржани од Москва, еден ден откако Путин ја призна нивната независност.