Ковачевски - Протоколот се работи на база на реципроцитет

Протоколот се работи на база на реципроцитет, вели премиерот Димитар Ковачевски во интервју за МИА. Тој вели дека без согласност на двете страни, и на Скопје и на Софија, не може да се случи никаква промена во однос на ниту една од точките во протоколот.

На прашањето дали имал увид во овој документ, дали воопшто има усогласен протокол, кога јавноста ќе може да има увид во него, Ковачевски не даде директен одговор.

„Обврските или задачите кои ќе си ги поставиме ние и Бугарија како две држави, билатерално, тие важат и за двете страни. Никој нема мандат да прифаќа еднострани барања ниту, пак, може да дејствува по нив. Реципроцитетот како принцип е основа за сѐ што се работи“, рече Ковачевски.

Тој вели дека протоколот е всушност записник од состанок меѓу министерствата за надворешни работи, билатерален документ кој не ја условува преговарачката рамка, и, како што вели, воопшто не е ни споменат во преговарачката рамка.

Европски политичари го промовираат францускиот предлог, странски експерти му наоѓаат маани

„Дотолку повеќе протоколот потврдува дека тој не е поврзан и не ги условува почетокот на преговорите. Од таа причина, апелирам да не се шпекулира и за содржината и за важноста на овој документ“, вели премиерот.

Додава дека историските прашања се во надлежност на Историската комисија, која, како што, изјави целосно автономно работи.

Утре францускиот предлог е пред пратениците. Тој очекува плодна и суштинска дискусија во Собранието и дека пратениците ќе размислуваат државнички и трезвено.