Израелскиот претседател на комеморација за убиените олимпијци во 1972 година во Минхен

Израелскиот претседател Исак Херцог ќе присуствува на утрешната церемонија во Минхен, Германија по повод 50-годишнината од терористичкиот напад извршен од палестинските милитанти во кој загинаа 11 израелски спортисти на Летните олимписки игри во 1972 година, објави неговиот кабинет на 4 септември.

Херцог го опиша нападот како „страшен масакр“. На церемонијата, чиј домаќин ќе биде германскиот претседател Франк-Валтер Штајнмаер, се очекува да присуствуваат и околу 70 членови на семејствата на жртвите. Делегација ќе испрати и израелскиот олимписки комитет.

Семејствата на загинатите олимпијци во 1972 година ќе добијат отштета од Германија

На 5 септември 1972 година, милитантите на палестинската група „Црн септември“ упаднаа во просториите на израелскиот олимписки тим во Минхен. Две лица беа смртно застрелани во првичниот напад, а други девет беа земени како заложници.

Следниот ден, за време на неуспешниот обид за нивно спасување од страна на германските безбедносни сили, сите девет заложници беа убиени, како и пет од осумте милитанти.