Ковачевски и Донев на стартот на изградбата на железницата на Коридор 8
Премиерот Димитар Ковачевски и неговиот бугарски колега Галaб Донев, во придружба на министри од двете влади, претставници од Делегацијата на ЕУ и Европската банка за обнова и развој, денеска ќе присуствуваат на oтпочнување со градба на источен дел од железничкиот Коридор 8, секција Куманово - Бељаковце - Крива Паланка.
На настанот ќе се презентира проектот за источниот дел од делницата. Свои обраќања освен Ковачевски и Донев, ќе имаат и првиот вицепремиер Артан Груби, министерот за транспорт и врски Благој Бочварски, директорот на Железници „Инфраструктура“, Хари Локвенец, амбасадорот на Делегацијата на ЕУ во Република Северна Македонија Дејвид Гир и Анди Аранитаси од Европската банка за обнова и развој.
Со изградбата на оваа железница, како што се наведува во владиното соопштение, Република Северна Македонија станува крстосница на Балканот и регионално се поврзува со европските железнички коридори.
„Овој капитален проект е од исклучително значење особено за поврзување со нашите први соседи Бугарија и Албанија, што е од регионален интерес за граѓаните и за економскиот раст и развој“, соопштија од Владата.
Започнува изградбата на првите две делници од пругата Куманово- Бељаковце- Крива Паланка
Повторната изградба опфаќа работа на првите две од трите проектирани делници на источното крило на железничкиот Коридор 8, во вкупна должина од 88,2 километри (од Куманово до Бељаковце – 31 километар, од Бељаковце до Крива Паланка – 34 и од Крива Паланка до граница со Бугарија – 24 километри).