Заврши расправата по измените на Законот за урбанистичко планирање, ќе се гласа дополнително

Во Собранието денеска заврши расправата за предложените измени наЗаконот за урбанистичко планирање по скратена постапка, кој е дел од пакетот закони за изградба на коридорите 8 и 10 д. За предлог законот ќе се гласа дополнително.

Во текот на дебата од опозицијата уште еднаш обвинија дека е злоупотребено европското знаменце, дека Договорот за „Бехтел и Енка“ е склучен врз непостоечки закони, дека со него и со остaнатите закони се руши целокупниот систем на планско планирање и градење во државата, и дека се отвара врата за корупцијата.

„Начинот на кој Благој Бочварски и Артан Груби сакаат да го протуркаат овој закон беше со наоѓањето на врвни експерти од делот на урбанизмот кој се нафатија да се потпишат на некој закон со кој се суспендира целата постапка за изградба или се суспендира она што важи законска регулатива за сите останати субјекти во Република Македонија“, рече Игор Здравковски од ВМРО-ДПМНЕ.

Од владејачкото мнозинство пак, реплицираа дека опозицијата ја замајува јавноста со манипулации, и дека измените што се прават на законот не се однесуваат само на еден проект, туку за сите државни патишта, железнички пруги и магистрални гасоводи кои ќе ќе се градат во државата во идниот период. Со нив, како што велат, проектите од јавен и стратешки итерес ќе може да се релизираат по постапка која ќе биде забрзана, а ќе се овозможи побрз развој на економијата и отворање нови работни места.

„Кога сакате да напаѓате извадете ги сите информации за да може да се направи споредба. Едно нешто ќе се согласам со вас- дали требало тогаш подобро - да, дали може сега уште подобро - да и нема ништо спорно. Целта на ова и начинот на коешто сега го поминуваме во Собранието е да се отклонат оние пречки коишто правеле застој и ништо друго. Се друго останато е шпекулации“, рече пратеничката Марија Герогиевска од СДСМ.

По расправата по оваа точка потпретседателот на Собранието Горан Мисовски ја прекина 115-та седница, а продолжението го најави за в понеделник, 22 мај.

Владата предлага со европско знаменце да се носат измени на Закон за работни односи, на Законите за градба, за урбанистичко планирање, за експропријација, и на специјалниот закон за автопатиштата што треба да ги гради американско-турскиот конзорциум Бехтел и Енка.