Ердоган ги критикуваше одлуките на Уставниот суд на Турција
Турскиот претседател Реџеп Таип Ердоган во петокот на 10 ноември го критикуваше Уставниот суд за „многу грешки“, со што го поддржа Апелацискиот суд кој пак ја оспори неодамнешната одлука на Уставниот суд за ослободување на еден затвореник.
Коментарите поттикнаа дебата за владеење на правото што избувна во средата кога Апелацискиот и Касациониот суд поднесоа кривични пријави против судиите на Уставниот суд, кои минатиот месец донесоа одлука дека затвореникот Џијан Аталај треба да биде ослободен.
Во пресврт за кој критичарите рекоа дека укажува на сè помаргиналната позиција на правниот систем на Турција, највисокиот апелациски суд рече дека одлуката на Уставниот суд е неуставна.
„За жал, Уставниот суд направи многу грешки во низа во овој момент, што сериозно нè растажува. Уставниот суд не може и не треба да го потцени чекорот што го направи Касациониот суд по ова прашање“, рече Ердоган.
Адвокатската комора на Турција и главната опозициска партија го осудија потегот на Апелацискиот суд како „обид за државен удар“, а стотици членови демонстрираа, од кои многумина адвокати во униформи, скандирајќи „Правда“ на улиците на главниот град во петокот.
Ердоган, исто така, ги повика членовите на неговата владејачка партија АК да го поддржат оспорувањето на Апелацискиот суд. Со тоа, како што пренесува Ројтерс, тој таргетирал некои во неговите редови кои го критикувале потегот на Апелацискиот суд.
Спорот доаѓа во период кога Турција се обидува да ги привлече странските инвеститори и спороведува уште поостри економски политики откако Ердоган победи на тесните избори во мај. Некои аналитичари велат дека овие несогласувања би можеле да ги одвратат странските директни инвестиции.
Во коментарите дадени подоцна на церемонијата во Анкара, Ердоган рече дека спорот меѓу двата највисоки судови ја покажува потребата од нов устав, повторувајќи ја неговата долгогодишна позиција дека парламентот треба да го разгледа ова прашање следната година.