Протерувањето на хрватскиот дипломат од Србија го дестабилизира регионот, порачаа од Загреб
Хрватското Министерство за надворешни и европски работи соопшти дека одлуката на Србија да го прогласи првиот секретар на хрватската амбасада во Белград за персона нон грата ги влошува односите меѓу двете земји и ја дестабилизира ситуацијата во регионот.
На 20 ноември, Министерството за надворешни работи на Србија го прогласи Хрвој Шнајдер за персона нон грата бидејќи „грубо излезе од опсегот на дипломатските норми“.
Друго објаснување не беше дадено.
„Целосно ја отфрламе основата за протерување на акредитираниот хрватски дипломат. Споменатата одлука на Република Србија претставува чекор кон влошување на меѓусебните односи, како и натамошна дестабилизација на чувствителните регионални политички и безбедносни ситуации во време кога стабилноста во југоисточна Европа е од исклучително значење за цела Европа“, се наведува во соопштението на хрватското министерство.
„Загрижени сме дека протерувањето на хрватскиот дипломат претставува дополнителен притисок врз вработените во хрватската амбасада во Белград, што особено се манифестира во предизборниот период во Република Србија“, се додава во соопштението.
Хрватското министерство изразува жалење што очекуваната ескалација на односите од страна на Република Србија во овој момент била реализирана со драстична одлука за протерување дипломати.
Како што се нагласува, Хрватска го задржува правото да одговори на овој потег во моментот и на начинот на кој ќе избере.
Хрватска не треба „посилно“ да и одговори на Србија додека не се расчисти ситуацијата, изјави претседателот на Комисијата за внатрешна политика и национална безбедност на хрватскиот Сабор, Синиша Хајдаш Дончиќ за Хрватската радио-телевизија (ХРТ), коментирајќи го потегот на Белград.
Хрватската амбасада во Србија не ја објави оваа одлука со која Министерството за надворешни работи на Србија на 20 ноември го прогласи Хрвоје Шнајдер за персона нон грата бидејќи „грубо излезе од опсегот на дипломатските норми“. Одлуката, како што се наведува, е донесена во согласност со член 9 од Виенската конвенција.
Во соопштението не е прецизирано како Шнајдер ги надминал дипломатските норми.
Министерството за надворешни работи на Србија, како што се наведува во соопштението, изразува жалење за постапките на споменатиот дипломат во изминатиот период „што не придонесува за подобрување на билатералните односи меѓу Република Србија и Република Хрватска, добрососедски соработка и севкупно подигнување на нивото на мирот и стабилноста во регионот“.