На Криволак почнува најголемата воена вежба „Брз одговор 2025“
Повеќе од 2000 војници од државата, САД, Црна Гора, Косово, Австрија, Грција, Албанија, Италија и Обединетото Кралство ќе учествуваат во големата воената вежба „Брз одговор 2025“ која од денеска (26 мај) до 9 јуни ќе се одржи на армискиот полигонот Криволак во земјава.
Оваа вежба е дел од големата мултинационална вежба DEFENDER 2025 со околу 12000 војници кои учествуваат во различни земји низ Европа.
Северна Македонија ќе учествува со 950 припадници на Армијата, САД со 710, Црна Гора со 185 учесници, Косово со 150, Австрија со 70, Грција 50, Албанија 30, Италија 30 и обединетото Кралство со двајца учесници.
Сите единици ќе користат своја формациска опрема, а како позначајни ќе бидат тенковите Леопард, борбените хеликоптери „AH-64 APACHE“, транспортни медицински хеликопртери „Black hawk“, инженериско возило „Хаски“, минофрлачи 120милиметри, транспортен хеликоптер Ми 8/17 и оклопни возила JLTV i HMMWV.
На вежбата ќе се користи стандардна маневарска и боева пешадиска и артилериска муниција.
Како што соопштија од Генералштабот на АРМ, вежбата ја тестира способноста на НАТО да одговори на развојните безбедносни закани, вклучувајќи и сајбер напади, служејќи како важна платформа за усовршување на мултинационалната соработка и потврдување на подготвеноста на силите-учеснички да го споделат товарот во сложени и спорни средини.
Началникот на Генералштабот, генерал-мајор Сашко Лафчиски информираше дека оваа вежба е една од најголемите досега во државава во која ќе учествуваат околу 2200 војници од седум НАТО земји и две партнерски држави.
„Вежбата меѓу другото има цел да ја подобри интероперабилноста меѓу сојузничките и партнерските сили како и заедничко дејствување во сложени услови и брза реакција на силите во источниот дел на Европа“, истакна генерал-мајор Лафчиски.
„Брз одговор 2025“ се поклопува со 32-годишнината од Програмата на партнерски сојузни држави меѓу Националната гарда на Вермонт и Северна Македонија, под покровителство на Бирото на Националната Гарда на САД.
Според американската амбасадорка во земјава Анџела Агелер „Брз одговор 2025“ е јасен доказ за блиското и растечко партнерство меѓу Соединетите Држави и Северна Македонија.
„Преку заеднички обуки, ангажирање во заедницата и соработка со нашите НАТО сојузници, ја зајакнуваме нашата колективна посветеност на мирот и безбедноста. Овие вежби ја подобруваат воената подготвеност и ги зближуваат нашите заедници“, изјави Агелер.
Брз одговор 2025, се додава во соопштението, коинцидира со 32-годишнината од Програмата на партнерски сојузни држави меѓу Националната гарда на Вермонт и Северна Македонија, под покровителство на Бирото на Националната Гарда на САД.
Од Американската амбасада посочија дека САД и Северна Македонија продолжуваат да го зајакнуваат своето партнерство во одбраната, образованието, претприемништвото и граѓанското општество, поддржувајќи го институционалниот развој и безбедносните способности на Северна Македонија.
„Двете земји остануваат насочени кон проширување на соработката во енергетиката, одбраната, трговијата и културната размена, обезбедувајќи долгорочен просперитет и безбедност. Брз одговор 2025 е пример за обезбедување мир преку зајакнување на подготвеноста на НАТО и колективната одбрана“, соопштија од Американската амбасада.
Во пресрет на воената вежба, во Битола и Штип заеднички концерт одржаа Воениот оркестар на Армијата и оркестарот на Националната гарда од Вермонт, САД.
Отворениот ден за граѓаните со приказ на операмата од вежбата е закажан за 1 јуни во Кавадарци, а денеска ќе се одржи концерт во Скопје.
На 1 јуни од 10 до 12 часот ќе има изложување на градскиот плоштад во Кавадарци со оружје, возила, опрема за качување, роботи за откривање мини, тактичка опрема, дронови и игри на отворено со учество од Албанија, Австрија, Италија, Северна Македонија и САД.
На 2 јуни ќе се одржи мултинационален настан во живо, ден на медиуми и „високи“ гости на Криволак, а тогаш ќе се реализира и вежбата „Засилен пешадиски баталјон во напад“.