Стартува „Безбеден град“ - Камерите автоматски ќе казнуваат сообраќајни прекршоци
Од денеска на територијата на Скопје, Куманово и Тетово, како и на коридорите 8 и 10, официјално започна имплементацијата на системот за автоматско санкционирање на сообраќајните прекршоци „Безбеден град“. Во првата фаза, системот ќе детектира четири најчести прекршоци – непрописно паркирање, пречекорување на дозволената брзина, минување на црвено светло и управување возило со истечена сообраќајна дозвола.
Министерот за внатрешни работи Панче Тошковски, во гостување во Дневникот на МТВ, нагласи дека целта на „Безбеден град“ не е казнување на граѓаните, туку зголемување на безбедноста и спасување човечки животи. Тој информираше дека стапил во сила нов Правилник со кој се зголемува прагот на толеранција при мерењето на брзината, по бројните реакции од јавноста во изминатиот период.
Според новите правила, за брзини до 50 километри на час останува толеранција од 6 км/ч. Тоа значи дека, на пример, на улица со ограничување од 30 км/ч, камерата ќе регистрира прекршок дури од 37 км/ч. За брзини од 50 до 100 км/ч толеранцијата изнесува 9 км/ч, додека кај ограничување од 100 км/ч санкционирање ќе има при брзина од 113 км/ч, односно со толеранција од 12 км/ч.
Тошковски најави и дополнителен проект што ќе се реализира со поддршка на Македонски телеком, со кој граѓаните ќе добиваат информативни пораки за прекршоци сторени во рамки на дозволената толеранција. Со тие пораки, како што посочи, нема да се изрекуваат парични казни, туку ќе се испраќа предупредување за надминување на пропишаната брзина. Министерот потсети дека и возењето во рамки на толеранцијата може да има сериозни последици и дека во случај на сообраќајна незгода со тешки последици, одговорноста може да биде и кривична.
Од Министерството за внатрешни работи истакнуваат дека „Безбеден град“ е една од најзначајните инвестиции во сообраќајната безбедност во последните децении. Системот, нагласуваат, е насочен кон оние кои свесно ги кршат правилата, а камерите функционираат без дискриминација – секој прекршок се евидентира и санкционира подеднакво.
Висината на казните зависи од тежината на прекршокот. За пречекорување на брзината до 20 км/ч над дозволеното се предвидува глоба од 20 евра, од 20 до 30 км/ч – 45 евра, а од 30 до 50 км/ч – 300 евра и забрана за управување од три до 12 месеци. За пречекорување над 50 км/ч казната изнесува 400 евра, четири казнени поени и забрана за управување најмалку една година. Во населени места казните се построги и може да достигнат до 500 евра.
За минување на црвено светло, системот автоматски ќе изрекува глоба од 250 евра и забрана за управување од три до 12 месеци, а кривична одговорност следи доколку прекршокот предизвика опасност или сообраќајна незгода. Управување возило со истечена сообраќајна дозвола се казнува со 100 евра за возачот и 250 евра за сопственикот на возилото, додека за непрописно паркирање казните се движат од 30 до 50 евра, зависно од тежината на прекршокот.
Доколку глобата се плати во рок од осум дена, сторителот плаќа половина од износот. По истекот на рокот, казната се наплатува во целост, со можност за присилна наплата. Возач кој ќе добие три забрани за управување во период од четири години автоматски ја губи возачката дозвола, а повторно полагање е можно најрано по една година.
Надлежните очекуваат дека со целосното заживување на „Безбеден град“ ќе се намалат сообраќајните прекршоци, бројот на незгоди и човечките жртви на македонските патишта.