Медиум: именувањето на Тилерсон ќе го реши руското прашање
Поранешниот шеф на „ЕксонМобил“ (ExxonMobil) Рекс Тилерсон, кого Доналд Трамп го предложи како кандидат за функцијата државен секретар на САД, треба да го помине сослушувањето во Комитетот за надворешни односи на Сенатот на САД, кое ќе трае два дена. Сепак, со некои сенатори и државни службеници тој веќе разговараше и, како што пишува „Вашингтон Пост“, зборуваше многу остро за Русија. Ако го заземе истиот став и на официјалната седница, тогаш демократите тешко дека ќе можат да му попречат да застане на чело на Стејт департментот, истакнува авторот на статијата.
Трамп ќе има проблеми
Сепак, конкретните чекори или планови на Трамп во однос на Русија Тилерсон во тие приватни разговори не ги спомена, но покажа „трезвено и цврсто", како тој ја гледа оваа земја. „Јас разбирам дека Путин и Русија се однесуваат како закачковци на детско игралиште и почитуваат само сила, и со нив треба да се разговара од позиција на сила, инаку ќе имаме еден куп проблеми“, го наведува мислењето на Тилерсон еден од оние кои разговараа со него. Друг сенатор, кој сакаше да остане анонимен, изјави дека Тилерсон го покажал своето разбирање на тоа каква закана во целина Русија претставува за САД и нивните сојузници.
Покрај тоа, поранешниот прв човек на „ЕксонМобил“ достави снимки од своите настапи пред различна публика последниве години во кои, според сенаторите, тој изразувал реалистични, но во суштина релевантни ставови на светската политика. На пример, тој изјавил дека САД треба да соработуваат со Русија како со глобален снабдувач на енергетски ресурси. А најголемата закана за Европа, според него, се тероризмот, бегалците и економската стагнација.
Како што признаваат сенаторите од редовите на Демократската партија, дали тие ќе ја одобрат кандидатурата на Тилерсон за функцијата државен секретар или не, зависи главно од она што тој ќе зборува за Русија и нејзината политика – како на приватни средби, така и на официјалната расправа. Притоа лицата кои се запознаени со тоа предвидуваат дека ќе има многу прашања за Русија до кандидатот за државен секретар на САД и тој ќе мора да каже жестоки работи ако сака да ја добие функцијата. Меѓутоа, во овој случај, неговата позиција може да се разидува со ставовите на неговиот иден шеф Доналд Трамп, истакнува „Вашингтон Пост“, пренесува ИноТВ.