MMA-utøvar går til sak mot Oslo kommune
Den tidlegare MMA-utøvaren Geir Kåre Nyland (29) blei lam frå brystet og ned etter ei stupeulukke i Bjørvika i Oslo. No går han til sak mot kommunen.
8. november sende advokat Christian Lundin inn stemning til Oslo tingrett på Nylands vegne, skriv VG.
– Kommunen har tre veker på å gi eit tilsvar og eventuelt erkjenna ansvar, eller bestrida det. Når fristen er gått ut blir det eit planleggingsmøte der det blir sett eit tidspunkt for ei eventuell rettssak, seier advokaten.
Før ulukka til 29-åringen i mai 2021 var det sett opp «grunt vatn»-plakatar i området. Nyland meiner skiltinga var for lite synleg.
Lundin antydar at det kan bli snakk om erstatningssum på over 10 millionar kroner.