«Affeksjonsverdi» nominert til åtte Bafta
«Affeksjonsverdi» blei tirsdag nominert til Bafta for beste film og i sju andre kategoriar.
Renate Reinsve er nominert til beste kvinnelege skodespelar, Inga Ibsdotter Lilleaas er nominert til beste kvinnelege birolle. Stellan Skarsgård er nominert i kategorien for beste mannlege birolle, og Joachim Trier er nominert til beste regissør.
Joachim Trier og Eskil Vogt er også nominert til Bafta i kategorien for beste manus. Yngvill Kolset Haga og Avy Kafman er nominert til beste casting. Og filmen er nominert til beste internasjonale film og beste film.
Nominasjonane til Bafta-prisane, som feirar fjorårets filmar, blei offentleggjort tirsdag. «Affeksjonsverdi» sto på langlista til åtte kategoriar, og blei nominert i alle desse kategoriane.
Britanes svar på Oscar, British Academy Film Awards (BAFTA) blir delt ut av The British Academy of Film and Television Arts.
Bafta-prisane blir delt ut søndag 22. februar i London.