Noreg sterkast i EM-stafetten – vann etter spennande skyteduell
Dei norske herrane gjekk heilt til topps under EM-stafetten på Sjusjøen søndag. Tyskland sikra sølvet, medan Frankrike tok bronseplassen.
Spenninga toppa seg då tre nasjonar kom samla inn til siste skyting. Ankermann Isak Leknes Frey gjekk kontrollert inn til standplass saman med franske Valentin Lejeune, med tyske Leonard Pfund jagande like bak.
Sjølv om Frey fekk to bom, lada han ekstraskota så raskt at han kunne gå ut i leiinga framfor Pfund, som skaut feilfritt.
På den siste runden viste Frey seg som den sterkaste og sikra gullet for Noreg. Sivert Gerharden, Kasper Kalkenberg og Martin Nevland gjekk dei tre første etappane.
Frey er tatt ut til OL som reserve. Laurdag blei han europameister som vinnar av jaktstarten.