ایران د تهران په ګډون ځینو ښارونو کې پر فعالیتونو بندیز لګوي
له کرونا ویروس سره د مبارزې لپاره د ایران د ملي کمېټې ویندوی علیرضا رييسي پرون دوشنبه وویل، د ۱۵۰ ښارونو د دوه اوونیزې ټولبندۍ په لړ کې به یوازې د خوراکي موادو پلورنځي، نانویانې، روغتونونه، کتنځي او درملتونونه پرانیستي وي.
سره له دې چې په ایران کې د کرونا ویروس مثبتې پېښې او ورڅخه مړینې زیاتې دي، د ایران حکومت د اقتصادي ستونزو له کبله له ټولبندۍ ډډه کوله.
د ایران د رسمي شمېرنو پر اساس په وروستیو ورځو کې په دغه هېواد کې د ورځې څه باندې ۱۳ زره تنه په کرونا ویروس اخته کېږي او د ورځې ۴۵۰ تنه ورڅخه مري.
خو د ایران د روغتیايي نظام اداره وايي چې نن سبا په دغه هېواد کې له ۱۳۰۰ څخه تر ۱۸۰۰ تنه په کوویدو نولس مړه کېږي.