د چین د بشري مرستو لومړۍ محموله کابل ته ورسېده
په کابل کې د چین سفیر وانګ یو تېره شپه پر خپله ټویټرپاڼه دا خبر خپور کړی او ویلي یې دي چې دا مرستې د کډوالو چارو وزارت ته سپارل شوي دي.
نوموړي زیاته کړې چې دې مرستو کې کمپلې او نورې تودې جامې شاملې دي.
د چین سفیر له افغانستان سره دا مرسته د خپل هېواد د کلکې ملګرتیا یوه نښه بللې ده.
وانګ یو ویلي، هېواد یې له افغانستان سره د مرستې لپاره څه باندې ۳۰ میلیونه ډالره په پام کې نیولي دي.
څو اونۍ وړاندې قطر او پاکستان هم له افغانستان سره ورته بشري مرسته وکړه.