Bordi i RTK-së e quan politik vendimin e Kuvendit për shkarkimin e tij
Kuvendi i Kosovës ka shkarkuar të enjten anëtarët e bordit të televizionit publik të Kosovës – Radio Televizionit të Kosovës (RTK).
Deputetët votuan për shkarkimin e tetë antarëve të bordit, pas rekomandimit të Komisionit Parlamentar për Administratë Publike, Pushtet Lokal, Media dhe Zhvillim Rajonal.
Kryetar i bordit të RTK-së ka qenë Sali Bashota.
Në mesin e anëtarëve të tjerë kanë qenë edhe: Agron Gashi, Lirim Geci, Fadil Miftari, Ilir Bytyçi, Bajram Mjeku, Petrit Musolli dhe Albinot Maloku.
Vetë anëtarët e bordit të RTK-së, e kanë quajtur vendimin për shkarkim si politik, antiligjor dhe ndërhyrje flagrante në punën e transmetuesit publik.
Përmes një reagimi të përbashkët, bordi ka thënë se do të ndjekë rrugët ligjore për ta kundërshtuar atë, që e ka konsideruar, vendim arbitrar.
“Arsyetimi i shumicës parlamentare për shkarkimin e Bordit të RTK-së nuk ka asnjë argument faktik, përpos motivit të qartë politik. Bordi aktual ka qenë një ndër bordet më profesionale, i përbërë nga emra të njohur të fushës akademike dhe të mediave”, është thënë mes tjerash në reagim.
Kryetarja e Komisionit Parlamentar për Administratë Publike, Pushtet Lokal, Media dhe Zhvillim Rajonal, Doarsa Kica-Xhelili, ka thënë gjatë seancës se, rekomandimi për shkarkim bëhet në pajtim me Ligjin për RTK-në.
Ajo ka thënë se ”anëtarët e bordit drejtues në vazhdimësi kanë dështuar t’i sigurojnë qasje të papenguar dhe të pakontestuar Zyrës së Auditorit të Përgjithshëm në auditivin e rregullsisë dhe performancës”.
Sipas saj, viteve të fundit ka pasur tendencë për shpenzime të mëdha dhe rritje të pakontrolluar të numrit të puntorëve.
Kica-Xhelili ka thënë se, më 2020, në RTK ishin të punësuar 1,024 puntorë, nga të cilët 806 me kontrata të rregullta.
“Kjo ka shkaktuar gjendje të rëndë financiare, shprehur përmes borxhit të RTK-së që varion në mes të 2.6 milionë dhe 5.2 milionë eurove ndërmjet 2018 – 2020”, ka thënë ajo.
Kica-Xhelili ka thënë edhe se bordi nuk ka siguruar që shpenzimet e RTK-së të mos kalojnë të hyrat, gjë që e ka për detyrë.
Nga Vetëvendosja kanë thënë se është koha që RTK-ja “t’i shërbejë publikut e jo vetvetes”.
Kundër shkarkimit të bordit të RTK-së janë shprehur partitë në opozitë, Partia Demokratike e Kosovës (PDK), Lidhja Demokratike e Kosovës (LDK) dhe Aleanca për Ardhmërinë e Kosovës (AAK).
Bedri Hamza nga PDK-ja ka thënë se po vendoset një presedan i keq në Kosovë dhe se Kuvendi po shndërrohet në gjykatë.
“Shkarkoni me një vendim të gjitha bordet”, ka porositur Hamza.
Agim Veliu nga LDK ka thënë se RTK ka pasur nevojë për një auditim të thellë, por jo për llogaridhënie kolektive siç ndodhi të enjten.
“Kjo që po ndodh sot, nuk është ndikim, por kapje klasike ose shtetëzim i transmetuesit publik”, ka thënë ai.
Radio Televizioni i Kosovës është transmetues publik i Kosovës, me mision informues, edukues, kulturor dhe argëtues.
Themelues i RTK-së është Kuvendi i Kosovës dhe, sipas ligjit, Kuvendi mbron autonominë institucionale dhe siguron financim adekuat për realizimin e misionit të shërbimit publik të RTK-së, të përcaktuar me këtë ligj.
Bordi i RTK-së është organ kolegjial-drejtues i RTK-së me 11 anëtarë, në mesin e cilit, sipas ligjit, duhet të jenë personalitete të dalluara të fushave të ndryshme si: kultura, arti, kinematografia, gazetaria, drejtësia, biznesi dhe menaxhmenti, marrëdhënie me publikun, marrëdhënie ndërkombëtare, universiteti, media dhe teknikë.