Aksidenti me autobus: 26 persona lirohen nga spitali, 15 vazhdojnë trajtimin

Ministri i Mbrojtjes në Qeverinë e Kosovës, Armend Mehaj, ka njoftuar të martën për lirimin nga spitali të 26 personave të plagosur në aksidentin me autobus të një kompanie nga Kosova, të dielën në Sllavonski Brod të Kroacisë.

Mehaj ka hënë se 15 persona janë duke u trajtuar ende, ndërkaq njëri prej tyre është në gjendje të rëndë.

Si pasojë e aksidentit të së dielës, kanë vdekur 10 persona dhe mbi 40 të tjerë janë plagosur.

Mehaj ka thënë se të liruarve nga spitali dhe pjesës tjetër të udhëtarëve do t’iu sigurohet transporti përmes linjave ajrore nga Aeroporti i Osjekut.

Në autobus kanë qenë 67 udhëtarë dhe dy shoferë.

Njëri shofer ka vdekur, ndërsa tjetri është marrë në pyetje të hënën nga Zyra e Prokurorit të Shtetit, në qarkun në Sllavonski Brod.

Autoritetet kroate kanë thënë se ekziston dyshim i bazuar se i dyshuari 52-vjeçar ishte duke vozitur autobusin në anën jugore të autostradës në kundërshtim me ligjin për trafikun rrugor.

Sipas autoriteteve, shoferi, në gjendje të lodhjes dhe paaftësisë për të drejtuar automjetin në mënyrë të sigurt, nuk ka lëvizur në distancë të mjaftueshme dhe ka përfunduar në sipërfaqen me bar.

Për pasojë, autobusi më pas është përplasur.