MSH: Katër viktima dhe mbi 2.100 të infektuar me koronavirus
Ministria e Shëndetësisë në Kosovë ka njoftuar të mërkurën (18 gusht) se janë regjistruar edhe katër viktima nga koronavirusi i ri.
Bazuar në 10.258 mostra të testuara, pozitivë në koronavirus kanë dalë 2.110 persona. Kthyer në përqindje del se nga numri i testimeve 20 për qind kanë dalë pozitivë.
Më së shumti raste pozitive ka në Prishtinë, 375, pasuar nga Gjilani me 168 dhe Gjakova 166.
Nga grupmosha 20-29 vjeç të infektuar janë 473 persona, ndërkaq nga 30-39 vjeç janë infektuar 408 vetë.
Po ashtu, nga mosha 10 deri 19 vjeç, sipas Ministrisë së Shëndetësisë, në 24 orëshin paraprak kanë dalë pozitivë me COVID-19, 194 persona.
Aktualisht raste aktive në Kosovë janë 12.159. Sipas njoftimi, në 24 orëshin paraprak janë shëruar edhe 130 pacientë, duke e çuar numrin e përgjithshëm në 106.408.
Që prej 13 marsit të vitit 2020 deri më 18 gusht 2021, Kosova ka regjistruar 120.862 raste me COVID-19, ku 2.295 kanë përfunduar me fatalitet.
Kosova e ka nisur procesin e imunizimit në muajin mars. Prej fillimit të vaksinimit në të gjitha qytetet e Kosovës, janë dhënë 622.068 doza të vaksinës.
Deri më 18 gusht 215.329 qytetarë janë vaksinuar me dozën e dytë.
Më herët, Shërbimi Spitalor Klinik Universitar i Kosovës (SHSKUK), ka thënë se në spitalet e përgjithshme në Kosovë si dhe në klinikat për trajtim të koronavirusit, janë të shtrirë 575 pacientë, prej tyre 468 me koronavirus.
Sipas SHSKUK-së, 29 pacientë janë në gjendje të rëndë dhe 418 po trajtohen me oksigjenorapi.
Ministri i Shëndetësisë në Kosovë, Arben Vitia, ka thënë të martën se më 18 gusht do t'i propozojë Qeverisë së Kosovës masa të reja për luftim të pandemisë, si pasojë e rritjes së numrit të të infektuarve me koronavirus.
Ai ka thënë se kufizimet e reja do të përfshijnë orar të kufizuar të bizneseve të gastronomisë, meqë shpërndarja më e madhe e virusit ka thënë të jetë pasojë e organizimeve në ambiente të mbyllura.
Instituti Kombëtar i Shëndetësisë Publike në Kosovë ka thënë se rastet pozitive me SARS CoV-2 janë në rritje në mënyrë rapide me variantin Delta i cili është dominant.
Autoritetet kanë ftuar qytetarët që të zbatojnë masat rigoroze të ndërmarra bashkë me masat tashmë të njohura: bartja e maskave, mbajtja e distancës dhe mbajtja e higjienës, si dhe t’i përgjigjen fushatës së vaksinimit.