Festa e Krishtlindjeve nën hijen e Omicronit
Shumë kisha u desh të anulonin shërbimet e parapara për festë dhe mijëra plane udhëtimesh po ashtu u anuluan derisa njerëzve u është kërkuar edhe njëherë të respektojnë rregullat për distancë dhe bartje të maskës.
Në Betlehem- qytetin palestinez në Bregun Perëndimor - për të cilin të krishterët besojnë se është vendlindja e Jezusit, megjithatë pati disa ceremoni.
Daullistët e gajdexhitë parakaluan nëpër qytet më 24 dhjetor derisa turma e njerëzve, shumë më e vogël se zakonisht, shikonte. Në anën tjetër në Izrael është në fuqi ndalimi për fluturime, gjë e cila i mbanë turistët larg vendit.
Para pandemisë në Betlehem mblidheshin mijëra njerëz e pelegrinë të krishterë nga e gjithë bota.
Kjo është hera e dytë me radhë që Krishtlindjet shënohen nën masat e rrepta kundër përhapjes së pandemisë.
Një mori veturash, që bartnin patriarkun e Jerusalemit, Pierbattista Pizzaballa, megjithatë morën rrugë në Jerusalem. Pasi arriti në sheshin Manger, para Kishës së Lindjes në Betlehem, Pizzaballa mbajti meshën e mesnatës.
Ndërkaq në Vatikan, Para Françesku kremtoi Natën e Krishtlindjeve përpara një turme të limituar me rreth 2 mijë njerëz, tek Bazilika e Shën Pjetrit. Të gjithë përpos Papës kishin maska në fytyrë.
Papa, parakaloi deri tek altari kryesor i Kishës Sistine derisa kori i kishës këndonte duke shënuar kështu festën modeste në Vatikan.
Papa tha se Jezusi, i lindur, në varfëri do të duhej të përkujtonte njerëzit që t’ju shërbesh të tjerëve është më e rëndësishme sesa të kërkosh status ose paraqitje sociale apo të kalosh gjithë jetën në kërkim të suksesit.
“Në këtë natë të dashurisë duhet të kemi vetëm një frikë: të mos ofendojmë dashurinë e Zotit duke e lënduar nëse urrejmë të varfrit me indiferencën tonë”, tha Papa Françesku.
Megjithatë, 2 mijë njerëz që ishin lejuar brenda kishës ishin shumë më shumë se 200 të cilët u lejuan të ndiqnin meshën në vitin 2020 kur Italia në kohë Krishtlindjeje ndodhej në izolim total.
Por kjo shifër mbetet shumë e vogël kundrejt kapacitetit të Kishës së Shën Pjetrit e cila zë deri në 20 mijë njerëz.
Në kohën para pandemisë kisha do të ishte e mbushur me njerëz për liturgjinë më masive të vitit në Vatikan.
Festa e Krishtlindjes këtë vit rastisi në kohën kur numri i të infektuarve me variantin Omicron të koronavirusit po rritet shpejt, dhe la në hije bashkimet e planifikuara familjare. Omicroni madje solli edhe masat e rrepta kundër përhapjes së pandemisë.
Varianti i ri i koronavirusit pengoi shumë udhëtime e pushime, derisa mijëra fluturime në botë tashmë u anuluan që nga 24 dhjetori, njoftoi ueb-faqja Flightaware.com.
Disa fluturime në SHBA u anuluan për shkak të numrit të madh të të infektuarve me koronavirus brenda stafit të kompanive ajrore.
Ndërkaq në Evropë disa shtete imponuan masat e rrepta të cilat pengojnë gëzimin e festës.
Holanda është kthyer në izolim, derisa Spanja e Italia detyruan bartjen e maskës edhe në ambiente të hapura.
Sërish më 24 dhjetor, Franca e Britania shënuan numër rekord të të infektuarve brenda ditës me COVID-19. Rrjedhimisht, qeveritë e të dyja shteteve u bënë thirrje qytetarëve që të marrin edhe dozën e tretë përforcuese të vaksinës kundër koronavirusit.
Në SHBA, presidenti, Joe Biden e shoqëroi bashkëshorten e tij, zonjën e parë, Jill Biden në një vizitë në Spitalin e Fëmijëve në Uashington.
Çifti bashkëbisedoi me pacientët dhe mjekët derisa një djaloshi i treguan fotografinë e Komandantit, qenushit të ri të Shtëpisë së Bardhë.
Më pas çifti Biden, i ulur afër pemës së Krishtlindjes dhe lexoi një libër për fëmijët, të inspiruar nga filmi i animuar “Frozen”.
Numri në rritje i të infektuarve me COVID-19 megjithatë nuk është aq shqetësues për amerikanët sa për t’i penguar që të mos udhëtojnë për t’i takuar të dashurit e tyre. Nuk e ndali as Babadimrin.
Edhe fluturimi i Babadimrit u mundësua në hapësirën ajrore të Kanadasë, pas testit negativ ndaj COVID-19 dhe dëshmisë së vaksinimit të plotë, njoftoi ministri i Transportit i Kanadasë.
Komanda e përbashkët amerikano-kanadeze për hapësirë ajrore (NORAD) u mundësoi qytetarëve të gjurmojnë drejtpërdrejt udhëtimin e Babadimrit në një ueb-faqe të posaçme, derisa po udhëton nëpër botë.