Paraburgim edhe për dy të dyshuarit e tjerë për dhunimin e 11-vjeçares

Gjykata Themelore në Prishtinë njoftoi të martën se dy të dyshuarve për dhunimin e 11-vjeçares u është caktuar masa me nga një muaj paraburgim.

Gjatë të hënës, masë me kohëzgjatje të njëjtë paraburgimi u ishte caktuar edhe dy të dyshuarve të tjerë.

Aktualisht në paraburgim janë katër nga pesë të dyshuarit për dhunimin e të miturës. Sipas PK-së personi i pestë i dyshuar, cili ka qenë në kërkim, tani është duke u intervistuar nga policia.

Një 11-vjeçare dyshohet së është dhunuar nga pesë persona, më 27 gusht, në Prishtinë, njoftoi të hënën Policia e Kosovës. Sipas PK-së viktima është dërguar në një strehimore.

Rasti dyshohet se ka ndodhur në një park të qytetit.

Të dyshuarit për dhunimin e 11-vjeçares janë tre të mitur me inicialet G.R, G.J dhe XH.S. Si dhe, personi i katërt i moshës madhore, me inicialet E.R.

Rasti nxiti reagime të shumta, si nga udhëheqësit e institucioneve, ashtu edhe nga përdorues të tjerë të rrjeteve sociale.

Qytetarë dhe organizata të ndryshme joqeveritare paralajmëruan protesta në Prishtinë, për të martën dhe të mërkurën.