Daçiq: Angazhimi ynë ka pamundësuar që të zbatohen fletarrestimet për Dodikun dhe Stevandiqin

Ministri në detyrë i Punëve të Brendshme në Serbi, Ivica Daçiq, tha se angazhimi i shtetit të tij ka parandaluar zbatimin e fletarrestimeve për presidentin e entitetit të Republikës Sërpska, Millorad Dodik, dhe kryetarin e Parlamentit të këtij entiteti në Bosnje e Hercegovinë, Nenad Stevandiq.

Sipas njoftimit, kjo ka “ofruar siguri” për qytetarët serbë, pra Dodikun dhe Stevandiqin.

Më 27 mars, Gjykata e Bosnje e Hercegovinës i kërkoi INTERPOL-it të lëshojë një “njoftim të kuq” për Dodikun dhe Stevandiqin, të cilët dyshohen se kanë kryer veprën penale të “sulmit ndaj rendit kushtetues të Bosnje e Hercegovinës”.

Serbia ka dërguar një notë proteste në INTERPOL sa i përket fletarrestimeve për Dodikun dhe Stevandiqin, duke thënë se ato shkelin një nen të statutit që përcakton se çdo veprim nëse ka një sfond politik, ushtarak, fetar ose racor është rreptësisht i ndaluar.

Më 27 mars, Daçiq deklaroi se Dodik dhe Stevandiq janë shtetas të Serbisë dhe se fletarrestimeve ndërkombëtare që Bosnja po iu referohej nuk përbënin bazë për veprim, pasi nuk kanë kaluar nëpër procesin e verifikimit për të parë nëse janë përmbushur kushtet.

Në njoftimin e 1 prillit u tha se kërkesa për fletarrestime ndërkombëtare aktualisht është në fazën e “shqyrtimit preliminar nga Task-Forca për Fletarrestime Ndërkombëtare në INTERPOL, që po verifikon përputhshmërinë me statutin dhe rregullat e organizatës”.

Vendimi përfundimtar merret nga Komisioni për Kontrollin e Dosjeve të INTERPOL-it, që mblidhet të paktën tri herë në vit dhe, sipas njoftimit të Ministrisë së Punëve të Brendshme të Serbisë, seanca e radhës është planifikuar për periudhën ndërmjet 7 dhe 11 prillit.

“Republika e Serbisë respekton institucionet ndërkombëtare dhe kornizën ligjore, por nuk do të devijojë nga procedurat e saj në mbrojtjen e të drejtave dhe interesave të qytetarëve të saj”, u tha në njoftim.

Gjithashtu, në njoftim thuhet se Serbia do të mbetet e përkushtuar ndaj këtij procesi dhe se do të marrë pjesë aktivisht në të gjitha hapat “për të siguruar që vendimi të merret në favor të qytetarëve tanë, drejtësisë dhe ligjshmërisë”.