Зариф: Эрон созишномаи ҳастаиро бознигарӣ намекунад
Теҳрон созишномаи ҳастаӣ бо қудратҳои ҷаҳониро, ки соли 2015 ба имзо расид, бознигарӣ намекунад,- гуфт Муҳаммадҷавод Зариф, вазири умури хориҷии Эрон.
"Эрон қарордодеро, ки солҳо солҳо пеш қабул шуд ва ҳоло татбиқ мешавад, бознигарӣ намекунад..мо ҳамчунин ҳамагуна тасвиби дигарбораи ин санадро қабул надорем"- гуфт Зариф рӯзи 3 май дар як видео, ки дар Ютуб нашр шуд.
Раиси ҷумҳури Ийолоти Муттаҳидаи Амрико Доналд Трамп аз мунаққидони шадиди созиши ҳастаии соли 2015 бо Эрон аст, ки бар пояи он Теҳрон розӣ шуд, барномаҳои ҳастаиашро дар ивази лағви таҳримҳои байналмилалӣ маҳдуд кунад.
Трамп ба кишварҳои аврпуоӣ, ки ба ин санад имзо гузоштаанд то рӯзи 12 май фурсат дод, то ба гуфтаи ӯ "камбудиҳои ваҳшатнок"-и ин санадро ислоҳ кунанд, вагарна Вашингтон аз он хориҷ мешавад ва таҳримҳои алайҳи Эронро тамдид мекунад.
Зариф гуфт, Ийолоти Муттҳаидаи Амрико " ҳамвора қарордоди ҳастаиро нақз ва дигаронро метарсонад, то аз бозгашти тиҷорат ба Эрон ҷилавгирӣ кунад",- гуфт Муҳаммадҷавод Зариф.
Дабири кулли СММ Антонио Гутерриш аз шикастани паймони ҳастаӣ бо Эрон ҳушдор дод ва гуфт, "агар рӯзе қарордоди беҳтар аз ин таҳия шавад, чӣ хуб, аммо мо набояд аз қарордоди феълӣ даст кашем, дар ҳоле, ки алтернативаи беҳтар надорем".