СММ: генералҳои Мянмар бояд барои наслкушӣ ҷавоб гӯянд
Раҳбарияти артиши Мянмар бояд бо иттиҳоми наслкушӣ ба ҷавобгарӣ кашида шавад - чунин аст хулосаи гузориши коршиносони Созмони Милали Муттаҳид, ки далелҳои таъқиби мусалмонҳои Роҳинҷа аз тарафи низомиёни Мянмарро таҳқиқ карданд. Фишурдаи ин гузоришро нашрияи The New York Times рӯзи 27 август нашр кард.
Ба гуфтаи коршиносони СММ, ки беш аз як сол вазъи Мянмар ва маъракаи мақомот бар зидди мусалмонони Роҳинҷаро омӯхтаанд, далелҳо ба ин далолат мекунанд, ки таъқибҳо хусусияти наслкушиӣ доранд.
Дар гузориши миссияи Созмони Милали Муттаҳид гуфта мешавад, ки бар зидди шаш генерали баландпояи Мянмар бояд аз рӯи ҷиноят алайҳи инсоният айб эълон шавад. Иттиҳом аз ҷумла бояд бар зидди генарал Мин Аун Хлаина, сарфармондеҳи артиши Мянмар, эълон шавад.
Коршиносони СММ бар ин назаранд, ки низомиёни Мянмар дар баробари маъракаи иҷборан ба Бангладеш пеш кардани 700 ҳазор мусалмони Роҳинҷа масъулият доранд.
Бинобар ҳисобҳо дар маъракаи саркуби мусалмонони Роҳинҷа дастикам 10 ҳазор нафар кушта шуд. Дар гузориши СММ раҳбари мулкии Мянмар, барандаи ҷойизаи Нобел, Аун Сан Су Ҷӣ танқид шудааст, ки натавонист зимоми низомиҳорор дар даст нигаҳ дорад.