Ҷасади 9 коргари русро аз нақби сӯхта берун оварданд
Мақомоти Русия ҷасади 9 коргареро, ки дар натиҷаи сӯхтор дар як кони маъдани калий ба ҳалокат расиданд, берун баровардаанд. Фалокат рӯзи 22-уми декабр дар вилояти Перм рух дод.
Ба гуфтаи мақомот, ҳангоми корҳои сохтмонӣ дар нақб дар умқи 340 метр сӯхтор сар задааст ва коргарон натавонистаанд, аз нақб берун оянд. Нақб ба ширкати “Уралкалий” тааллуқ дорад ва Кумитаи тафтишоти Русия дар робита ба ин ҳодиса парвандаи ҷиноӣ боз кардааст.
Дар рӯзи ҳодиса 17 нафар дар дохили нақб қарор доштаанд ва танҳо ба 8 нафар муяссар шудааст, ки аз онҷо берун оянд. Ҷасади фавтидагонро як рӯз баъд берун кашиданд, чун дуди ғализ дар нақб имкон надодааст, наҷотбахшон ба ҷойи лозимӣ бирасанд.