Ихтилофи Ғанӣ ва Абдуллоҳ. Амрико $1 млрд аз кӯмакҳояш ба Афғонистонро қатъ кард
Вазорати умури хориҷии Амрико бо нашри як баёния, ки лаҳни он ниҳоят шадид мебошад, аз идомаи ихтилофҳо байни Ашраф Ғанӣ ва Абдуллоҳ Абдуллоҳ дар мавриди натиҷаҳои интихоботи президентӣ, интиқод кардааст. Ин баёнияи Вазорати умури хориҷии Амрико ин ихтилофҳоро "таҳдид алайҳи амнияти миллии ИМА" хондааст.
Вазорати умури хориҷии Амрико дар ин баёния гуфтааст, ки як миллиард доллар кӯмакҳои худро барои Афғонистон қатъ мекунад. Вашингтон шарт гузоштааст, ки танҳо дар сурати ташкили як "ҳукумати фарогир ва мушорикат дар раванди сулҳ", дар кӯмакҳои як миллиарддолларии худ бознигарӣ хоҳад кард.
Ин баёнияи Вазорати умури хориҷии Амрико пас аз он нашр шуд, ки Майк Помпео пас аз ҳафт соат мулоқоту гуфтугӯҳо дар Кобул, Афғонистонро тарк кард ва ба Давҳа -- пойтахти Қатар рафт.
Оқои Помпео дар Кобул бо Ашраф Ғанӣ ва Абдуллоҳ Абдуллоҳ мулоқот намуд. Тибқи гузоришҳо, Вазири умури хориҷии Амрико бидуни онки дар мавриди гуфтугӯҳояш бо Ашраф Ғанӣ ва Абдуллоҳ Абдуллоҳ чизи бигӯяд, Кобулро тарк кард.
Майк Помпео рӯзи душанбеи 23-юми март барои ҳалли ихтилофҳои сиёсии ахир ворид Кобул шуд. Аммо ба гузориши "Ассошиэйтед пресс", ҳавопаймои ҳомили Вазири умури хориҷии Амрико бидуни эълони натиҷа аз рафъи итхтилофҳои сиёсӣ, Кобулро тарк кард.
Қаҳҳор Обид, раиси дафтари Абдуллоҳ Абдуллоҳ ба Радиои Озодӣ гуфт, ки нишастҳои рӯзи душанбе бенатиҷа анҷом ёфт. Ӯ афзуд, ки хостаҳои онҳо мавриди пазириш қарор нагирифтааст.
"Нишасти муштарак сурат гирифт ва поён ёфт. Дар он, тағйири сохтор, ки аз ҷониби мо матраҳ шуда буд, аз сӯи оқои Ғанӣ қабул нашуд. Бинобар ҳамин, нишаст ҳам бидуни натиҷа поён ёфт". Раиси дафтари Абдуллоҳ Абдуллоҳ дар мавриди хости мушаххасашон дар бораи тағйири сохтор, ҷузъиёти бештар ироа накард.
Раёсати ҷумҳури Афғонистон мегӯяд, Ашраф Ғанӣ дар мулоқоташ бо Майк Помпео дар бораи раванди сулҳ ва вазъи амниятӣ ва сиёсии Афғонистон гуфтугӯ карданд. Аммо манбаъ дар бораи баҳс роҷеъ ба ҳалли ихтилофҳои сиёсӣ чизе нагуфтааст.
Як мақоми Вазорати умури хориҷии Амрико, ки Майк Помпеоро дар ин сафар ба Афғонистон ҳамроҳӣ мекард, ба хабарнигорон гуфтааст, дар ҳоли ҳозир онҳо нигаронанд, ки агар бӯҳрон дар зудтарин фурсат ҳал нашавад, раванди сулҳ ва гуфтугӯҳо барои поён ёфтани ҷанги 40-сола, халалдор хоҳад шуд.
Кашмакашҳои интихоботи президентии соли дар Афғонистон Вашингтонро нигарон кардааст, ки сулҳи бадастомада бо Толибонро зери хатар қарор медиҳад. Ду ҳафта пеш Ашраф Ғанӣ ва Абдуллоҳ Абдуллоҳ дар маросимҳои ҷудогона дар Кобул савганди президентӣ ёд карданд.
Танишҳои сиёсӣ миёни Ашраф Ғанӣ ва Абдуллоҳ Абдуллоҳ пас аз он боло гирифт, ки Комиссияи мустақили интихоботи Афғонистон оқои Ғаниро барандаи интихоботи президентӣ эълом кард. Аммо Абдуллоҳ Абдуллоҳ онро напазируфт ва ҳукумати худашро эълон кард.