Путин: Овоздиҳӣ ба тағйири конститутсия дар мӯҳлати дигар барпо мешавад
Президенти Русия Владимир Путин эълон кард, ки овоздиҳӣ барои қабули тағйирот ба конститутсияи кишвар ба мӯҳлати дигар вогузор мешавад. Ин бори 12-ум аст, ки Путин дар давоми чор давраи раёсатҷумҳуриаш ба мардуми кишвар тавассути телевизион муроҷиат мекунад.
Путин гуфт, дар пасманзари паҳншавии коронавирус тасмим гирифт, ки таърихи баргузории раъйпурсӣ ба санаи дигар гузаронида шавад. Қарор буд овоздиҳӣ барои қабули тағйироти конститутсионӣ, ки шарти асосиаш ба ҳеҷ баробар кардани собиқаи гузаштаи раёсатҷумҳурии Путин ва боз кардани имкони ширкати баъдии ӯ дар интихоботи ояндаи президентӣ мебошад, 22 апрел баргузор мешуд. Элла Памфилова, раиси Комиссиюни интихоботии Русия гуфт, ки дар ҷаласаи изтирории ин ниҳод рӯзи ҷумъа ин мавзӯъ баррасӣ мешавад.
Путин дар суханронии рӯзи 25 марташ гуфт, ки мардуми Русия аз 28 март то 5 апрел ба таътили сартосарии якҳафтаина ҷавоб дода мешаванд. “Амнтарин кор ҳоло дар хона будан аст”, гуфт Путин.
Ӯ гуфт, ки барои пешгирӣ аз паҳншавии бештари вирус тамоми захираҳои тиббӣ сафарбар шудаанд. Путин инчунин гуфт, ки дар давоми моҳҳои наздик ба оилаҳои соҳиби фарзанди хурдсол кӯмакпулӣ дода мешавад. Пардохти кӯмакҳои иҷтимоӣ дар давоми ним соли оянда тамдид мешавад.
Ӯ инчунин гуфт, ки дар пардохти қарзҳои бонкӣ сабукӣ ҷорӣ мешавад.