Садҳо маҳбуси зиндони Саратов гуфтанд, ки шиканҷа шудаанд
Беш аз 180 маҳбуси зиндони рақами 13-и шаҳри Энгелси Саратов шикоят доранд, ки баъди боздиди ҳомиёни ҳуқуқ латтукӯб шудаанд. Дар ин бора хабаргузориии "Интерфакс" бо истинод ба раиси Комиссияи минтақавии назорати ҷамъиятӣ Денис Соболев иттилоъ додааст.
Ба гуфтаи маҳбусон, 182 зиндонӣ бевосита дар дохили маҳбас латтукӯб шуда, се тани дигар дар бемористони касалиҳои сили Хадамоти федеролии иҷрои ҷазо (ФСИН) дар Русия мавриди хушунат қарор гирифтаанд. Даҳҳо маҳбуси дигар аз шароити нигаҳдорӣ дар зиндони 13 шикоят кардаанд.
400 маҳбуси зиндони рақами 13-и Энгелс ва бемористони касалиҳои сил шикоят карда буданд, ки зиндонбонҳо дар баробари латукӯбу шиканҷа аз онҳо пул низ талаб мекунанд.
Шиканҷа шудани маҳбусон дар зиндони Саратов ва бемористони касалиҳои сили Хадамоти федеролии иҷрои ҷазо дар Русия ибтидои моҳи октябр расонаӣ шуд.
Gulagu.net 4-уми октябри имсол ба нашри нахустин видеоҳое шуруъ кард, ки дар онҳо иддао мешуд маҳбусон аз ҷониби кормандони Хадамоти федеролии амният (ФСБ) ва Хадамоти федеролии иҷрои ҷазо (ФСИН) дар Русия шиканҷа мешаванд.