Боздошти чанд узбекистонӣ бо иттиҳоми интиқоли ғайриқонунии одамон ба Амрико
Мақомоти интизомии Узбекистон мегӯянд, аз чанд кушиши интиқоли ғайриқонунии шаҳрвандони ин кишвар ба Амрико пешгирӣ кардаанд.
Расонаҳои маҳаллӣ бо истинод ба Хадамоти амнияти давлатии Узбекистон иттилоъ додаанд, ки сокини шаҳри Самарқанд, соли таваллудаш 1979 аз як сокини маҳаллӣ бар ивази интиқоли ӯ тавассути Мексика ба Амрико 25 ҳазор доллар талаб кардааст. Ӯ ҳангоми гирифтани 15 000 доллар боздошт шудааст.
Ду сокини ноҳияҳои Пастдарғом ва Каттақӯрғони Самарқанд низ бо иттиҳоми ҳамсон дастгир шудаанд. Боздоштшудаҳо ваъда додаанд, ки дар ивази 23 ҳазор доллар довталабонро тавассути Туркия, Арманистон ва Мексика ба ИМА мерасонанд. Онҳоро ҳангоми гирифтани 12 ҳазор доллар дастгир кардаанд.
Сафорати ИМА дар Узбекистон ахиран эълом кард, узбекистониҳое, ки ғайриқонунӣ марзи Мексикаро убур ва вориди ИМА мешаванд, акнун боздошт ва то содир шудани қарори ихроҷашон дар боздошт нигаҳ дошта мешавнад.
Пештар расонаҳо навишта буданд, дар ду соли охир шаҳрвандони Узбекистон дар рӯйхати касоне, ки ғайриқонунӣ вориди ИМА мешаванд, ба мақоми севум расидаанд. Дар ин бора дар оморе зикр шудааст, ки онро Fox News нашр карда буд.