Ҷасади се низомии амрикоӣ дар Литва пайдо шудааст
Аз чор сарбози амрикоӣ, ки ҳангоми тамрин дар Литва бедарак шуда буданд, ҷасади се нафари онҳо пайдо шудааст. Ҷустуҷӯи сарбози чорум идома дорад. Дар ин бора фармондеҳии нерӯҳои мусаллаҳи ИМА дар Аврупо ва Африқо хабар додааст.
Дар хабари расмӣ омадааст, мақомоти Литва ва Лаҳистон барои пайдо кардани сарбозон ёрӣ расондаанд.
Мошини зиреҳпӯши М88 Hercules-и артиши Амрико, ки дар тамрини низомӣ ширкат дошт, рӯзи 25-уми март бо чор низомӣ бедарак шуд. Дертар маълум шуд, ки нақлиёт ба бероҳа рафта, ба ботлоқ афтидааст. Рӯзи 31-уми март мошинро берун оварданд.
Марк Рютте, дабири кулли НАТО дар ҷараёни сафараш ба Вашингтон гуфт, ки низомиён ҷон бохтаанд.
Фармондеҳии артиши Амрико қаблан дар бораи сарнавишти низомиён расман хабар надода буд.