NYT: Ёриҳои Департаменти давлатӣ барои кишварҳои фақир шояд бас шавад
Маъмурияти Доналд Трамп пешниҳод кардааст, ки буҷаи Департаменти давлатии Амрико 50 дарсад кам карда шавад. Дар ин бора нашрияи "Ню Йорк Таймз" хабар додааст.
Ба қавли ин расона, тибқи санадҳо буҷаи Департаменти давлатӣ ё Вазорати корҳои хориҷии Амрико аз 54 миллиард ба 28 миллиард доллар коҳиш дода мешавад. Ин кор ба қавли расона, метавонад ба маблағузории ИМА ба Созмони Милал ва НАТО таъсири ҷиддӣ расонад.
"Ню Йорк Таймз" менависад, Амрико метавонад маблағгузорӣ ба амалиётҳои сулҳҷӯёна, барномаҳои фарҳангӣ ва омӯзиширо, ки аз тарафи Департамент анҷом мешуданд, пурра қатъ кунад. Инчунин мумкин аст, нисфи маблағ барои хариди ёриҳои башардӯстона ва лоиҳаҳо барои таъмини дору ва ваксина барои кишварҳои қашшоқ низ қатъ шавад.
Пешниҳоди Кохи Сафед дар бораи буҷа бояд аз сӯи Конгресс тасдиқ шавад. Дар миёни қонунгузорони Амрико кам нестанд нафароне, ки мухолифи кам кардани барномаҳои ҷаҳонӣ ҳастанд.