"46 кас ҷон бохт, садҳо нафар маҷрӯҳ шуданд". Дар Бандар-Аббос чӣ гузашт?

Дар таркиши рӯзи 26-уми апрел дар бандари Шаҳид Раҷоӣ маъруф бa Бандар-Аббоси Эрон тақрибан панҷоҳ нафар ҷон бохта, беш аз ҳазор каси дигар маҷрӯҳ шудаанд.

Расонаҳо бо такя ба манобеи худ гуфтанд, маводи кимиёие, ки аз Чин барои сохтани мушак оварда мешуд, таркидааст. Мақомоти Эрон ин иддаоро рад карда, мегӯянд, таҳқиқ ҳанӯз ба поён нарасидааст.

Дар наворҳо дида мешавад, ки дар оғоз як оташи хурде сар мезанад ва пас аз чанде доманаи он васеъ шуда, таркиш ба вуҷуд меояд. Таркиш ва оташу дуди он ба ҳадде буд, ки ҳукумат маҷбур шуд, дари мактабу корхонаҳоро дар ин минатқа бибандад.

Дар ду рӯзи охир талош шуд, ки бо мошинҳои обпош ва чархболҳо оташро хомӯш кунанд, вале ҳанӯз дар маҳалли ҳодиса дуд дида мешавад.

Масъуд Пизишкиён, раисҷумҳури Эрон, ба дидори шахсони маҷрӯҳ рафт: “Дастурот барои пайгирии мушкилот дода шудааст. Мушкилоте, ки ҳаст, талош дорем, ки ҳал кунем.”

Мақомоти Эрон мегӯянд, аз ҳазор шахси маҷрӯҳ ҳудуди дусад нафар дар бемористон бистарӣ ҳастанд.

Бандар-Аббос дар Халиҷи Форс аз муҳимтарин пойгоҳҳои интиқоли молу маҳсулот дар минтақа аст. Аз тариқи ин бандар молу маҳсулоти Эрон ба кишварҳои дигари дунё ва аз он тараф ба Эрон интиқол меёбад. Ҳоло кори ин бандар қатъ шудааст ва маълум нест, кай аз сар гирифта мешавад.