Як хешованди наздики Башор Асад дар Сурия боздошт шуд
Мақомоти Сурия писари амаки Башор Асад, президенти сарнагуншудаи ин кишварро дастгир кардаанд. Дар ин бора 21-уми июн хабаргузори давлатии CAHA хабар дод. Вазорати корҳои дохилии Сурия ҳам ин хабарро тасдиқ кардааст.
Дар изҳороти расмӣ омадааст, ки Васим Асад “яке аз қочоқбарони калони маводи мухаддир дар Сурия аст ва дар ҷиноятҳои ҳукумати пешин ҳам даст дорад.”
Хабаргузории расмии Сурия навиштааст, Васим Асад дар минтақаи марзӣ бо Лубнон дастгир шуд. Ҳанӯз расман хабар дода нашудааст, ки ин хешованди Башор Асад ба чӣ муттаҳам мешавад.
Васим Асад соли 2023 аз сӯи ИМА ва Иттиҳоди Аврупо таҳрим шуда буд. Ӯро ба даст доштан дар қочоқи маводи мухаддир ва роҳбарии як гуруҳи шибҳинизомии наздик ба Башор Асад айбдор мекарданд.
Худи Башор Асад дар моҳи декабри соли 2024 баъди суқути ҳукуматаш ба Русия фирор кард. Маскав ба ӯ ва оилааш паноҳандагӣ дод.