ВКД аз қатли як падар ба дасти писар хабар дод
Вазорати корҳои дохилии Тоҷикистон аз як ҷинояти мудҳиш ва ё қатли падар ба дасти писар хабар дод.
Вазорат рӯзи 23-юми декабр бо нашри баёнияе гуфт, як падари 69-сола ва писари 40-солааш зоҳиран ҳангоми сархушӣ бо ҳам ҷангу даъво кардаанд, ки бо фоҷиа поён ёфтааст.
Ба иттилои вазорат, ҳодиса рӯзи 20-уми декабр дар ноҳияи Ишкошим дар Вилояти Мухтори Кӯҳистони Бадахшон рух додааст.
Дар баёния омадааст, падар ҳангоми даъво бо белча ба дасти писараш зад ва писари хашмгин дар ҷавоб падарро бо чангаки оҳанин кӯфт, ки “ӯ рӯи оташдон афтода баъд аз чанд соат ҷон дод”.
Ному насаби падару писарро зикр накардаанд ва назари муттаҳам ба ҷиноят ҳам маълум нест, ки ҳоло дар боздошт аст.
Дар Тоҷикистон қатли падар ба дасти писар аҳёнан рух медиҳад ва ҷинояте ғайриқобили тасаввур дониста мешавад.