Tramp Er-Riýadda “ýarag satmak boýunça iň uly şertnamany” baglaşdy
ABŞ-nyň prezidenti Donald Tramp we Saud Arabystanynyň mirasdüşer şazadasy Muhammed bin Salman 13-nji maýda, amerikan lideriniň Er-Riýada eden saparynyň çäginde, uly möçberli ýarag üpjünçiligi boýunça şertnama gol çekdiler.
Resminamada Birleşen Ştatlaryň Saud Arabystanyna jemi 142 milliard dollarlyk ýarag toplumyny satmaga razy bolandygy bellenilýär. Ak Tam tarapyndan ýaýradylan beýanatda bu şertnama “Waşington tarapyndan şu wagta çenli baglaşylan iň uly goranyş hyzmatdaşlygy şertnamasy” hökmünde häsiýetlendirilýär.
Reuters agentliginiň bellemegine görä, baglaşylan şertnama ondan gowrak amerikan goranyş kompaniýasyny öz içine alýar, we howa hüjüminden hem raketadan goranyş, harby howa güýçleri, kosmos ösüşi, deňiz howpsuzlygy we aragatnaşyk ýaly ugurlary göz öňünde tutýar.
Saud Arabystany ABŞ-nyň iň uly ýarag satyn alyjysydyr. Reutersiň ýazmagyna görä, öňki prezident Jo Baýdeniň administrasiýasy Saud Arabystanynyň Ysraýyl bilen gatnaşyklaryny kadalaşdyrylmagyny hem göz öňünde tutýan giňişleýin ylalaşygyň çäginde, goranyş şertnamasyny baglaşmak üçin synanyşdy, emma bu tagalla netije bermedi.