Deňiz suwy sowuk, kenarda howply ýylanlar köpelýär - çeşmeler
Deňizde suwa düşüp, çägesöw kenarda gyşaryp, gezim edip dynç aljak adamlar suwuň aşa sowukdygyny aýdýarlar.
“Geçen hepde howanyň gyzgynlyk derejesi birneme tomus aýyndaka meňzäpdi. Şu günler howanyň derejesi Awazada 25° görkezýär. Deňiz kenarynda dynç almaga gelenler bir gün bolup, suw aşa sowuk bolansoň, öýlerine gaýdyp gidýärler” diýip, Azatlyk bilen anonimlik şertinde gürleşen hünärmen aýtdy.
Onuň tassyklamagyna görä, gijelerine deňiz kenarlaryna gezelenje çyksaň, hatda üşeýärsiň, iň erbedi bolsa, “Awaza” kenary uly ýylanlardan doldy.
Ýerli ýaşaýjy ol ýylanlary “gum kepjebaş ýylanlary” diýip atlandyrdy.
"Ýigrimiden gowrak adamy ýylan çakdy"“Şu tomus sezonynda dynç almaga gelenleriň arasynda, maňa belli bolanyny aýtsam, 20-den gowrak adamy ýylan çakdy. Olary derrew hassahana ýerleşdirip, ilkinji zerur kömekleri berdiler. Häzire çenli ölüm hadysasy hasaba alynmady” diýip, hünärmen aýtdy.
Tejribeden belli bolşy ýaly, türkmen metbugaty, şol sanda milli syýahatçylyk zolagynyň ýolbaşçylary bu hili ýagdaý barada ilata açyk, jikme-jik düşündiriş bermeýär.
Ýöne häkimiýetler myhmanlary ýylanlardan goramak üçin käbir çäreleri gördüler, Türkmenbaşynyň gaýragoýulmasyz Tiz kömek merkeziniň 5 sany “Tiz kömek” ulagy, lukmanlary bilen, “Awazanyň” içindäki uly köçäniň ugrunda nobatçylyk çekmäge goýuldy diýip, söhbetdeşimiz aýtdy.
Şeýle-de, myhmanhanalaryň halas ediş toparlary, ýylan çakan adamlara gyssagly ýardam bermekleri, lukman gelip ýetişýänçä saklamak üçin, gysyjy rezin bagjyklar, garmon sanjymy dermanlary bilen üpjün edilýär.
“Gaty gorkuly, deňiz kenarynda kobra we gömülgen ýylanlary köpelipdir. Men çagalarym bilen dynç almaga gelipdim. Bir gün boldum. Çagalary deňze goýbermedim, howuzda suwa düşdüler. Indi gaýdyp barýarys” diýip, Aşgabatdan gelen myhman aýtdy.
Sammit bahanasy we ýolbaşçylar topary 'halky deňizden kowýar'Azatlyk bilen aýry-aýrylykda gürleşen adamlar şu ýyl deňiz ýakasynyň has howply bolandygyny, deňiz suwunyň çekilmegi netijesinde, düwlenler, ýylanlar bilen dynç alyp, “aý, gowusy, öýümde oturjak sag-aman” diýen karara gelendiklerini aýtdylar.
“Adamlar gelip başlady, ýöne uzak gitse iki gün bolup, öýlerine gidýärler, suw sowuk. Dürli ýylanlar we düwlenler köpeldi, myhmanhanalar sagat belläp, deňiz kenaryna geçmäge rugsat berýärler” diýip, ýerli ýaşaýjy aýtdy.
Habarçylarymyz mundan öň adamlaryň şu ýylyň tomsunda “Awazada” dynç alyp bilmeris diýip alada edýändiklerini habar beripdiler.
Azatlyk bilen anonimlik şertinde gürleşen lukmanlaryň, halas ediş toparlarynyň wekilleriniň aýtmaklaryna görä, deňiz kenarynda dynç almagyň, suwa düşmegiň iň amatly wagty iýul aýynyň aýagynda başlanýar, ýagny suw awgust aýynda gyzýar.
Ýöne Türkmenistan şu ýylyň ikinji ýarymynda “Awaza” milli syýahatçylyk zolagynda Deňze çykalgasy bolmadyk we ösüp barýan döwletleriň halkara maslahatyny geçirýär we, sammit bahanasy bilen, ýönekeý adamlar gelýän aýda Awaza goýberilmez diýip, söhbetdeşlerimiz aýdýar.
Şeýle-de, howanyň gowy gyzýan we deňiz suwunyň gowy ýylaýan aýynda, awgustda bu ýere ýolbaşçylar toparynyň maşgalalary dynç almaga gelýärler, dynç alyş zolagy halk üçin doly ýapylýar diýip, anonimlik şertinde gürleşen ýaşaýjy aýtdy.
Azatlyk bu mesele boýunça hiç bir resmi düşündiriş alyp bilmeýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.