Qırım aq-uquq qorçalayıcıları Bağçasarayda Han sarayını qorçalav boyunca uquqiy kampaniyanı başlamaq niyetindeler

Qırım adliyecileri ve advokatları Bağçasarayda Han sarayını qorçalav boyunca uquqiy kampaniyanı başlamaq niyetindeler. Bunı özüniñ Facebooktaki saifesinde advokat Emil Kurbedinov yazdı. 


Kurbedinov: «Bizim advokatlar ve adliyeciler komandası Bağçasarayda Han sarayını, qırımtatarlarnıñ tarihiy mirası, medeniy miras obyektine esassız toqunuvdan qorçalav boyunca uquqiy kampaniyanı başlamaq niyetinde! Umumen qayd ete bilem ki, mevcut olğan vaziyette biz ilk nevbette Rusiye Federatsiyasından resmiy cevaplar almaq  niyetindemiz», – dep yazdı.


Advokat, aq-uquq qorçalayıcıları munasip vesiqalarnı alğan soñ halqara maqamlar seviyesine çıqmaq isteyler, dep qayd etti.


Ukraina Medeniyet nazirligi, Qırımnıñ Rusiye akimiyeti tarafından Bağçasaray qoruğınıñ territoriyasında yapılğan işler neticesine Han sarayınıñ baş binası içün dağıluv telükesi bar, dep iddia ete.


Qırımnıñ Rusiye akimiyeti bu qabaatlavlarnı red etip, işlerniñ devam etilmesi aqqında bildire.


QMC Milletlerara munasebetler ve sürgün etilgen vatandaşlarnıñ işleri boyunca Cumhuriyet komitetiniñ sabıq rehberi Edem Dudakov, işler yapılğan yerni ziyaret etip, Qırımnıñ Rusiye akimiyeti tarafından yapılğan keyfiyetsiz restavratsiya işleri neticesinde Bağçasaraydaki Han sarayı UNESCOnıñ dünya mirası obyektleri cedveline kirmek imkânını bütünley ğayıp etti, dep bildirdi.


Bağçasaraydaki Han sarayı, Suvdağdaki Ceneviz qalesi, Qırım astrofizik observatoriyası (rasadhanesi), Mangup-qale, Eski-kermen ve Çufut-qale UNESCOnıñ Dünya mirası obyektleri cedveline kirsetilmesi içün namzet olalar.


Bağçasaraydaki Han sarayı muzeyi – qırımtatarlarnıñ tarihı ile alâqalı olğan eñ belli muzey, Qırımnıñ Girey hanlarınıñ yazlıq rezidentiyası yeri. Muzey kompleskiniñ territoriyasında saray, harem binası, han mezarlığı ve cami bulunalar.