Ukraina TİN Qırımdan dolayı Rusiye ile dostluq añlaşmasını lâğu etmekni teklif etti
Ukraina tış işleri naziriniñ Avropanen bütünleşüv meseleleri boyunca muavini Olena Zerkalniñ fikrine köre, hususan, Rusiye Qırımda ötkergen saylâvlarından dolayı, Ukraina ile Rusiye arasındaki dostluq añlaşmasını lâğu etmek kerek.
«Ukraina ile Rusiye arasındaki dostluq, emekdaşlıq ve ortaqlıq añlaşmasını lâğu etmek kerek, çünki Rusiye, hususan, işğal etilgen Qırımda Rusiye prezidentiniñ saylâvlarını ötkererek, onı qaba şekilde bozğandır», – dep bildire Zerkalniñ sözlerini Twitterde Ukraina TİN.
Zerkal ayrıca, Añlaşmanen alâqalı noqta-i nazarnen oktâbr ayına qadar qarar bermek kerek olğanını bildire.
1997 senesi Rusiye ve Ukraina arasında imzalanğan dostlıq, emekdaşlıq ve ortaqlıq añlaşması Rusiye-Ukraina munasebetleriniñ esas vesiqasıdır.Eki devlet arasındaki «özara ürmet, suveren musaviylik, topraq bütünligi, sıñırlarına toqunmamazlıq, añlaşmamazlıqlarnı barışıq yolınen çezilüvi, küç qullanmamazlıq ya da küç qullanuv havfı, şu cümleden iqtisadiy ve diger usullar qullanmamaq üzre strategik ortaqlıqnı közde tuta».