«Başqa bir şey de beklemedik». Mahkeme Suleyman Kadırovğa qarşı ukümni quvette qaldırdı (video)

Kremlniñ kontroli altında olğan Qırım Yuqarı mahkemesi qırımtatar faaliyetçisi Suleyman Kadırovğa qarşı ukümni deñştirmeyip qaldırdı. Daa evel Kefe şeer mahkemesi onı «separatizm»de qabaatlı tanıp, şartlı olaraq eki yılğa azatlıqtan marum etilmesine ve bu muddet içinde cemiyette faaliyet köstermekniñ yasaq etilmesine mahküm etti. Qabaatlavnıñ versiyasına köre, 2016 senesiniñ martında Kadırov, özüni Aqmescitten bir qırımtatar olaraq tanıtqan ve Donbassnıñ işğal etilgen rayonlarını azat etmek içün «Qırım» batalyonınıñ meydanğa ketirilmesi aqqında bildirgen nasıldır Demyan Demyanenkonıñ videoroligini repost etti. Bir qaç aydan soñ repostnıñ altında Kadırovnıñ izaatı peyda oldı. İçinde şöyle sözler bar edi: «Qol tutam, Qırım evelden de, şimdi de ve kelecekte Ukraina olacaq». Bunıñ esasında faaliyetçige qarşı Rusiye Cinaiy kodeksiniñ 280.1 maddesi – devletniñ «topraq bütünliginiñ bozulmasına yönetilgen ve cemiyet içinde açıqtan yapılğan davetler» – boyunca iş açıldı. Kadırov, bu cinaiy işke, aq-uquqnı qorçalav saasındaki faaliyetlerine böyle etip keder etmek istegen Rusiye mahsus hizmetleriniñ provakatsiyasıdır, dedi.