Qırım ukümeti Tuzla adasını Rusiyeniñ mülkiyetine alıp berdi

Kremlniñ kontroli altında olğan Qırım ukümeti, üstünden qurulayatqan Keriç köprü keçken Tuzla adası rayonında qararnen 308,2 biñ ve 55,6 biñ kv. metr meydanlığındaki eki topraq arsasınıñ Rusiyeniñ mülkiyetine berilmesine dair qarar aldı.

Qırım ukümetiniñ emirinde: «Keriç şeer okrugı belediyesiniñ belediye mülkiyetinden federal mülkiyetke topraq arsalarını bedava qabul etmek. Topraq arsalarına federal mülkiyet aqqınıñ qabul-teslim aktınıñ tasdiqlanması kününden başlağanını tayin etmek», – denile.

Vesiqanıñ ilâvesinde, eki arsa, «Keriç boğazında naqliyat keçitiniñ qurucılığı» obyekti içün, ifadesi ile alıp berileler, denile.

Aprel 17-de Kremlniñ kontroli altında olğan Qırım ukümeti, Tuzla Beli adasında bulunğan 6,5 biñden ziyade kvadrat metr meydanlığındaki topraq arsasınıñ Rusiyeniñ mülkiyetine berilmesine dair qarar aldı.

Topraq arsasınıñ Rusiyege berilmesini, Keriç boğazındaki köpür qurucılığınıñ sımarışçısı olğan «Taman» Rusiye avtoyollar idaresi talap ete edi.

Aperl 19-da Ukrainanıñ Vaqtınca işğal etilgen territoriyalar ve devlet içinde mecburen köçken şahıslarnıñ meseleleri boyunca nazirligi, Rusiyeniñ Qırımdaki ukümeti tarafından Tuzla adası territoriyasınıñ Rusiyeniñ mülkiyetine belilmesini taqbih etti.

Tuzla beli bir vaqıtları Taman yarımadası ile bağlı edi, lâkin keçken asırnıñ 1920-nci yıllarında ondan Tuzla adası ayırıldı.

Rusiyeliler Taman yarımadası tarafından damba qurmağa başlağanları sebebinden Ukraina ile Rusiye arasında çatışma başladı. Bunıñ neticesinde, 2003 senesinden başlap, Ukrainada Tuzla rejimli zona sayıla edi.

Tuzla etrafındaki çatışma, Ukraina ile Rusiye arasındaki munasebelterde bir buhran oldı. O, Tuzla adasınıñ aitligine dair davalar ve Rusiye tarafından Keriç boğazında adağa doğru dambanıñ qurulması sebebinden başlağan edi. Bazı talilcilerniñ fikrine köre, dambanıñ qurulmasından maqsat, Keriç boğazı ve Azav deñiziniñ statusı meselesini çezmek içün Ukrainağa tazyiq etmek edi.