Denisova Rusiyeden Qırımda Memedeminovnıñ hastahanege mecburiy yatqızıluv sebebini añlatqanını istey

Ukraina Yuqarı Radasınıñ İnsan aqları boyunca vekâletlisi Lüdmila Denisova Rusiyeden qırımlı bloger, vatandaş faali Nariman Memedeminovnıñ Qırım psihiatriya hastahanesine mecburen yatqızılğanına dair malümat bergenini talap etti.

Munasip vesiqanıñ kopiyasını Denisova iyülniñ 18-nde Facebookta derc etti.

«Rusiye prezidentiniñ mesleatçısı Mihail Fedotov ile Rusiyede insan aqları boyunca vekâletlisi memuriyetiniñ yolbaşçısına mektüp yollap, acele surette hastahanege mecburen yatqızıluv sebebi ve oña nisbeten nasıl tedbirler körülgeninen bağlı malümat berilgenini rica ettim», – dep qayd ete ukrainalı ombudsmen.

«Qırım birdemligi» birleşmesiniñ faali, qırımlı bloger Nariman Memedeminov Qırımda ekspertiza keçirmek maqsadınen psihiatriya hastahanesine yatqızıldı.

Mayıs 15-te Rusiyeniñ kontroli altında olğan Aqmescitniñ Kiyevskiy rayon mahkemesi, terrorizm propagandasında qabaatlanğan qırımtatar faali, vatandaş jurnalisti Nariman Memedeminovnıñ tevqif muddetini dört ayğa uzattı. Memedeminov avgustnıñ 15-ne qadar tahqiqat izolâtorında qalacaq.

Martnıñ 23-nde Qırım MC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden evelki taqiqatlarnıñ umumiy cedveline kirsetti.

Ukraina Milliy jurnalistler birligi (UMJB) Qırımda Memedeminovnıñ tevqif etilmesini «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.