Erdoğan Putinnen körüşti: pomidordan ğayrı, er şeyni laf ettiler
Sentâbrniñ 17-nde Türkiye prezidenti Recep Tayyip Erdoğan ve Rusiye prezidenti Vladimir Putin pomidordan ğayrı, qalğan bütün mallar boyunca ticaret sıñırlarınıñ lâğu etilmesi aqqında añlaştılar, dep haber ete Radio Svobodanıñ rus hızmeti.
Rusiye Devlet agentlikleriniñ malümatına köre, taraflar Rusiye ve Türkiye vatandaşları, şu cümleden mütehassıs ve iş adamları içün, viza rejimini qolaylaştırmağa añlaştı.
Suriye meselesinde de netice oldı, dep bildire TASS. Moskva ve Ankara İdlib bölgesinde silâlardan temizlenüv alanını meydanğa ketirmege añlaştılar.
«İnterfaks» rus agentliginiñ haber etkenine köre, Erdoğan, Ankara ve Moskva İdlibni terroristlerden temizlep, anda yapılacaq silâsız alannı beraber közetmek qararına kelgenlerini qayd etti.
«Rusiye ve Türkiye, silâsızlandırılğan bölge sıñırlarında koordineli patrul faaliyetini kösterecektir», – dedi Erdoğan.
Netice matbuat konferentsiyasında Putin ve Erdoğan Rusiye-Türkiye arasındaki munasebetler ğayrıdan tiklendi ve normal alına qaytqanlarını qayd etkenler.
Eki Devlet arasındaki munasebetler 2015 senesi noyabr ayında olğan adiseden soñ kerginleşken edi. Türkiye ordusı Su-24 rus uçağını tüşürgen edi.
Körüşüv sentâbrniñ 17-nde Soçi şeerinde olıp keçti. 10 kün evelsi Erdoğan, Putin ve İran prezidenti Hasan Rougani İblid meselesinde añlaşıp olamağan ediler.
Sentâbrniñ 14-nde Rusiye Tış işler naziri Sergey Lavrov Moskva adiy insanlar regionnı terk ete bilsin dep, gumanitar koridorlar açacağını aytqan edi. Aynı vaqıtta, «kerek olsa», Rusiye Suriyege darbe endirmege devam ete bile, dep tenbiyeledi.
Suriye ükümeti isyancılarnı İdlibten çetleştirmek içün büyük ücüm planlarını ilân etti.
Birleşken Milletlerniñ fikirince, ealisi üç million insan olğan İdlibke ücüm etilse, 900 biñ insan evlerini terk etmege mecbur olacaq.
BM ve ABD Devlet departamenti, ücüm olsa, İdlibte gumanitar felâket çıqar, dep bildirgen ediler.
2011 senesi Suriyede başlağan cenk neticesinde 400 biñden ziyade insan elâk oldı, millionlarnen insan evsi-barqsız qaldı.
Rusiye ve İran Suriye prezidenti başar Asadqa bu zıddiyette destek köstereler.