Zelenskiy Ukraina prezidenti vazifesine namzet köstermege niyetlengenini bildirdi
Oyuncı ve «Studiya Kvartal 95» bediiy reberi Vladimir Zelenskiy, kelecek Ukraina prezidenti saylavlarında iştirak etecegini aydınlattı. Bu aqta o, «Veçerniy kvartal» programmasınıñ yañı yıl yayını vaqtında bildirdi.
Zelenskiyniñ aytqanına köre, o, «Ukrainada bir şey deñiştirmege» qarar berdi.
«Meni çoqtan soraylar: baracaqsıñmı-yoqmı? Bilesiñizmi, men ulu siyasetçilerimiz kibi olmayıp, boşuna vade etmege istemedim. Şimdi ise, Yañı yılğa bir qaç daqqa qalğanda, sizge söz berem ve onı birden yerine ketirecem. Qıymetli ukrainalılar, Ukraina prezidenti vazifesine namzet köstermege vade etem. Birden yerine ketirecem. Ukraina prezidentine namzet kösterecem. Bunı beraber yapayıq. Yañı yılıñız hayırlı olsun, halqnıñ yañı hızmetçisi hayırlı olsun», – dedi video muracaatında Zelenskiy.
«Studiya Kvartal 95» icadiy birleşmesinen bağlı olğan «Halq hızmetçisi» («Sluga naroda» – QA) firqası 2013 senesi qayd olğan edi.
2018 senesi dekabrniñ 31-nde prezident saylavlarınıñ saylavaolı kampaniyası başladı. Ukraina devlet yolbaşçısınıñ saylavları 2019 senesi martnıñ 31-nde olacaq.