Poroşenkonıñ memuriyeti ukrainalı siyasiy mabüslerni azat etüv şurasını meydanğa ketirmege istey
Ukraina prezidenti memuriyetiniñ reis muavini Valeriy Kondratük ukrainalı siyasiy mabüslerniñ tuvğanlarınen körüşip, siyasiy mabüslerni azat etüv koordinatsion şurasına dair prezident buyruğınıñ leyhasını azırlamağa teklif etti. Bu aqta «ukrain diversantları davası» boyunca mahküm etilgen Yevğen Panovnıñ qardaşı İgor Kotelânets Qırım.Aqiqat mühbirine tarif etti.
«Belli mesüliyetli kişi bar – Prezident memuriyeti reisiniñ muavini Valeriy Kondratük. O, siyasiy mabüslerniñ tuvğanlarınen ve aq qorçalayıcılarnen beraber Siyasiy mabüslerni azat etüv koordinatsion şurasınıñ qurulmasına dair prezident buyruğı ya da emriniñ leyhasını azırlamağa vazife aldı. Al-azırda martnıñ soñuna qadar bir de bir netice almaq içün imkânlarımız daa çoq», – dedi o.
Kötelânetsniñ aytqanına köre, yaqın künlerde Ukraina prezidenti memuriyetiniñ vekili siyasiy mabüslerniñ tuvğanlarınen daa bir iş körüşüvini kerçekleştirecek.
«Bu aqta añlaştıq: prezident memuriyetiniñ adliyecileri Koordinatsion şurasınıñ işinen bağlı tekliflerimizni baqacaq. Bu mesele boyunca cuma künü (martnıñ 15-nde – QA) körüşüvimiz olacaq. Aq qorçalayıcı teşkilâtlarını da celp etecekmiz. Bundan soñ siyasiy mabüslerge qoltutuv meselesinen oğraşqan devlet hızmetleri ve aq qorçalayıcılarnıñ işini idare etken şura qurulmasına dair prezidentniñ ya buyruğı, ya emri olmalı», – dep añlattı o.
Ukraina Tış işler nazirliginiñ malümatına köre, Rusiye 70 ukrainalını qanunsız şekilde tuta. Azatlıq Radiosınıñ muracaatına kelgen cevapta aytılğanına köre, olarnıñ arasına Qırım yalısında Rusiye tarafından zapt etilgen 24 ukrainalı asker kirmey.
Ukraina Yuqarı Radası reisiniñ birinci muavini İrına Geraşçenko bildirgenine köre, Ukraina, Rusiyede ve işğal etilgen Qırımda tutılğan ukrainalı reine ve siyasiy mahkümler azat etilsin dep, Ukraina devletine qarşı cinayet işlegen 60 Rusiye vatandaşını bermege azır.
Uquq qoruyıcılarnıñ malümatına binaen, Rusiye ve o ilhaq etken Qırımda 60-tan ziyade Ukraina vatandaşı siyasiy sebeplerden dolayı serbestlikten marum etilgen buluna. Ukraina Tış işleri nazirligi Rusiyege, anda tutulğan ukrainalılarnı azat etmesi talabınen 300-ge yaqın nota yolladı.